Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
No segundo semestre do curso 2023/2024 o Centro de Linguas Modernas ofertará cursos de galego para non galegofalantes dirixidos principalmente á comunidade universitaria, mais tamén a todas as persoas maiores de 16 anos interesadas.
Fonte: Consello da Cultura Galega
A CRTVG vai producir 25 novos produtos dixitais en lingua galega nunha convocatoria á que destinará máis de 300 000 euros. Entre os proxectos, creados especificamente desde e para a contorna dixital, figuran contidos divulgativos, infantís, de entretemento, humor, educación, ficción ou cultura.
Fonte: CRTVG
Santiago de Compostela acolleu un acto organizado pola Mesa pola Normalización Lingüística no que O Apalpador lle pediu ao presidente da Xunta, que este sexa o último Nadal sen programación infantil e xuvenil en galego.
Fonte: Galicia Confidencial
Segundo a revista PNAS Nexus, existe unha relación entre o clima e o desenvolvemento das linguas, de maneira que as temperaturas ambientais exercen influencia no volume de certos fonemas, o que explicaría que nos países tropicais adoitan soar máis ruidosas, mentres que nos lugares fríos semellan máis silandeiras.
Fonte: O Povo
A institución foral destinará 1 470 000 euros para impulsar o éuscaro durante 2024 en tres áreas clave: fomento da lingua, edición de publicacións periódicas e desenvolvemento de produtos dixitais.
Fonte: Bizkaiko Foru Aldundia
Segundo os datos do Censo de Poboación realizado polo INE en 2021, máis da metade da poboación do arquipélago usa sempre o castelán no ámbito familiar, coas amizades e no traballo, uns datos que reflicten os cambios demográficos nas illas debidos á chegada de novos residentes.
Fonte: Última Hora
Segundo un estudo da OQLF, o 67 % da poboación quebequesa ve a televisión tradicional principalmente en francés, unha porcentaxe que diminúe notablemente nas plataformas de streaming, nas que cae ata o 42 %.
Fonte: Le Devoir
O Premio Internacional de Estudos Galegos, que convoca a Asociación Internacional de Estudos Galegos (AIEG) co apoio da Xunta de Galicia e da UMinho Editora, está dirixido a investigadores/as do ámbito dos estudos galegos en universidades de fóra de Galicia e cuxos traballos estean redactados en lingua galega.
Fonte: Consello da Cultura Galega
A Xunta de Galicia pon o broche de ouro a un ano de celebracións arredor da figura de Francisco Fernández del Riego, autor homenaxeado nas Letras Galegas 2023, coa presentación do último volume da colección Cadernos Ramón Piñeiro, titulado Francisco Fernández del Riego no río do tempo.
Fonte: O Portal da Lingua Galega
O Concello de Xinzo de Limia e a Fundación Carlos Casares outorgaron ao xornalista Antonio Piñeiro Feijóo a segunda edición do Premio de Xornalismo Literario Carlos Casares.
Fonte: Cultura Galega
Subscríbase ao boletín
