Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A actriz e xornalista Nerea Brey recibiu o premio Abrente de Textos Teatrais da Mostra Internacional de Teatro de Ribadavia pola súa obra Manual de patronaxe. Por outra banda, A Panadaría recibiu o premio do público pola súa peza As que limpan.
Fonte: Cultura galega
A Universidade de Santiago de Compostela (USC) e a Real Academia Galega (RAG) clausuraron a trixésimo terceira edición dos cursos de lingua e cultura galegas "Galego sen fronteiras" que contou coa participación de medio cento de estudantes de países de tres continentes.
Fonte: USC
O presidente da República de Suráfrica, Cyril Ramaphosa, asinou en Pretoria a Lei da Lingua de Signos Surafricana que garante o seu recoñecemento como lingua oficial, a décimo segunda do país.
Fonte: TRT
A Asociación de Universidades de Lingua Portuguesa (AULP, polas súas siglas en portugués) convocou a nova edición do Premio Fernão Mendes Pinto que galardoa as teses de doutoramento ou mestrado que contribúan á aproximación das comunidades de lingua portuguesa.
Fonte: Expresso das Ilhas
O filme O Corno, da cineasta vasca Jaione Camborda, será a primeira longametraxe en galego que competirá para a Cuncha de Ouro na sección oficial do Festival de San Sebastián.
Fonte: El Diario
Co fin de conmemorar o paso de Federico García Lorca por Compostela, que deixou a redacción de poemas en lingua galega, o Consorcio de Santiago inaugura agora na Casa do Cabido a mostra "Lorca en Compostela".
Fonte: Consorcio de Santiago
O Goberno de Timor Leste avaliará a expansión do proxecto de escolas luso-timorenses a postos administrativos do país co obxectivo de promover o coñecemento da lingua portuguesa a través da cualificación de profesores timorenses.
A Associaçom Galega da Língua (AGAL) renovou a súa presidencia na asemblea celebrada no Museo do Pobo Galego. O médico Jon Amil será o novo presidente da entidade reintegracionista, acompañado por un equipo no que se combinan nomes da anterior directiva con novas caras.
Fonte: Cultura galega
O académico e catedrático da Universidade de Vigo, Xosé Henrique Costas, compareceu na Asemblea da República Portuguesa como experto en linguas minoritarias onde presentou unha proposta para a salvagarda da lingua mirandesa.
Fonte: Real Academia Galega
A Cámara de Comercio de España e a Fundación pro Real Academia Española asinaron un acordo de colaboración que permitirá sacar adiante diferentes proxectos entre os que destaca o novo Dicionario da Lingua Española.
Fonte: Economía Digital
Subscríbase ao boletín
