Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
«Hala Birala!» é un programa gratuíto de lecer en éuscaro sobre redes sociais dirixido a menores nacidos nos anos 2011 e 2012. Entre os días 11 e 14 de abril aprenderán a crear, editar e compartir contidos en éuscaro dun xeito fácil e seguro.
Fonte: Ayuntamiento de Bilbao
Os datos mostran que na actualidade se imparten en castelán o 71,6 % das horas docentes; en galego, o 24,4 %; e noutras linguas, o 4 %, cifras case idénticas ás do curso 2021-2022.
Fonte: Consello da Cultura Galega
O programa de fomento do galego na Rede de Escolas Infantís Municipais da Coruña ten como obxectivo proporcionar recursos lúdicos e educativos nesta lingua e promover a galeguización na etapa educativa de 0 a 3 anos.
Fonte: Consello da Cultura Galega
A Xunta destina este ano 350 000 euros ás entidades locais de Galicia para a promoción do uso da lingua galega. O Diario Oficial de Galicia (DOG) convocou estas subvencións, dirixidas aos concellos galegos e agrupacións destes que superen os 3000 habitantes.
O Parlamento da República Moldova aprobou finalmente a lei que considera que o romanés é a lingua oficial do país.
Fonte: Euroactiv
O secretario de Estado da Educación de Portugal, Antonio Leite, mostrou a súa satisfacción ante a unanimidade que a clase política de Timor Leste mostra sobre o reforzo da lingua portuguesa no país asiático.
Fonte: Observador
O Goberno balear e o Instituto de Estudos Baleáricos publicaron Català en marxa! Guia de suport lingüístic en un context intercultural, unha guía para docentes que imparten obradoiros de acollida lingüística dirixidos a persoas sen coñecemento ningún do catalán.
Fonte: Govern Illes Balears
O Goberno de Cataluña encargoulle á Corporación Catalá de Medios Audiovisuais a creación dunha plataforma de contidos en catalán no mundo dixital, á que se destinará un orzamento de 30 millóns de euros. Esta OTT terá carácter gratuíto e estará dirixida ao público en xeral.
Como cada ano a Xunta de Galicia bota a andar o programa de dinamización lingüística FalaRedes, pensado para encher o tempo de lecer con actividades en galego entre os máis de 200 concellos e agrupacións pertencentes á Rede de Dinamización Lingüística.
Fonte: O Portal da Lingua Galega
Presentan no Senado do Brasil un proxecto de lei para que as persoas xordas e cegas teñan acceso á xustiza por medio da lingua de signos e o braille.
Fonte: Rádio Senado
Subscríbase ao boletín
