Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O escritor portugués António Lobo Antunes faleceu aos 83 anos en Lisboa. Considerado un dos autores máis importantes da literatura en lingua portuguesa, publicou máis de trinta novelas e recibiu importantes recoñecementos como o Premio Camões. A súa obra converteuno nun dos escritores máis influentes da literatura contemporánea portuguesa.
Fonte: Alentejo Ilustrado
No Mobile World Congress 2026 advertiuse do impacto que os sistemas de intelixencia artificial poden ter sobre as linguas con menor presenza dixital. Diversas persoas expertas sinalaron que moitas ferramentas están adestradas fundamentalmente con datos de idiomas dominantes, o que provoca desigualdades e nesgos, e limita a súa capacidade para comprender ou xerar contidos noutras linguas.
A Consellería de Educación, Cultura e Universidades da Comunidade Valenciana convocou o programa de intercambio escolar Pont de Llengües para o curso 2025-2026, co obxectivo de mellorar a competencia comunicativa en valenciano e favorecer a cohesión lingüística entre centros con realidades sociolingüísticas distintas. A iniciativa diríxese a centros públicos non universitarios que deberán presentar proxectos conxuntos con actividades educativas e unha xornada de convivencia presencial.
A Área de Normalización Lingüística da Universidade de Vigo convoca unha nova edición do seu certame literario en galego, dirixido á comunidade universitaria e dotado con 3600 euros en premios nas modalidades de poesía, relato curto e tradución. Cada categoría contará cun primeiro galardón de 700 euros e dous accésits de 250, para traballos orixinais e inéditos elaborados conforme á normativa oficial da lingua.
A Xunta de Galicia reivindica a fortaleza do idioma portugués no ensino galego con máis 5000 estudantes matriculados que multiplican por seis os 800 que había hai máis dunha década e cun número de docentes “equilibrado, realista e sen apenas interinidade”. Así o explicou o director xeral de Centros e Recursos Humanos, Jesús Álvarez, ante a Comisión 4ª do Parlamento, onde destacou o compromiso do Goberno galego co cumprimento da Lei Valentín Paz Andrade de fomentar os vínculos coa lusofonía.
O Parlamento de Nova Zelandia aprobou un proxecto de lei para recoñecer formalmente o inglés como lingua oficial do país, xunto co maorí e a lingua de signos de Nova Zelandia. Aínda que o inglés é a lingua máis usada polas persoas e polo goberno, os detractores e a oposición sinalan que a lei é innecesaria porque non cambia nada na práctica e pode restar atención á protección da lingua vernácula.
O Goberno de Gales e a comisaria da Lingua Galesa, Efa Gruffudd Jones, propoñen unha reforma ampla na educación para impulsar o uso do galés. As cifras mostran que o número de falantes diminúe e hai falta de escolas e docentes en galés, polo que reclaman medidas innovadoras e estruturais para garantir o seu uso en todos os ámbitos e poder atinxir o millón de falantes para o ano 2050.
Fonte: Diari de la Llengua
O Plan educativo de contorno de Lleida impulsa unha campaña de sensibilización lingüística destinada a reforzar o uso social do catalán no ámbito educativo ante o descenso da súa presenza nos centros. Baixo o lema «Parla en català i peta-ho!», a iniciativa inclúe vídeos con referentes da comunidade, creación de contidos por parte do alumnado e materiais de visibilización nos colexios. A proposta procura xerar contextos reais de uso da lingua entre a infancia e a mocidade e consolidar o catalán como ferramenta de cohesión, aprendizaxe e participación social.
O concelleiro de Normalización Lingüística de Pontevedra presentou a 16ª edición do Certame de Microrrelatos en Galego, promovido pola Escola Oficial de Idiomas coa colaboración municipal. A iniciativa, aberta a persoas maiores de 14 anos, busca reivindicar a vitalidade do galego como lingua de creación literaria a través de textos breves elaborados a partir de tres palabras propostas pola organización.
Ambas as entidades asinaron un convenio de colaboración por cinco anos co obxectivo de reforzar as sinerxías no desenvolvemento e promoción do éuscaro. O acordo prevé intensificar o traballo conxunto na difusión das normas do éuscaro unificado, no enriquecemento do vocabulario e na súa normalización en ámbitos científicos e técnicos.
Subscríbase ao boletín
