Un estudo de Plataforma per la Llengua sinala que a xentrificación está expulsando o catalán do barrio do Poblenou en Barcelona, coincidindo coa subida dos prezos da vivenda e coa chegada de poboación con maior poder adquisitivo. O informe evidencia que o uso social do catalán diminúe en comercios, rotulación e atención ao público, mentres crecen o inglés e o castelán. A falta de arraigamento dos novos residentes limita a adopción da lingua, mentres que políticas de promoción urbanística e comercial contribúen á transformación lingüística.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
29 de maio de 2026
29 de maio de 2026
A Escola Galega de Administración Pública, xunto coa Secretaría Xeral da Lingua, convoca dous cursos de linguaxe xurídica en galego para 2026, de nivel medio e superior, destinados ao persoal da Administración de Xustiza que traballe fóra de Galicia. A formación será en liña e o prazo de inscrición estará aberto ata o 5 de xuño.
Fonte: Consello da Cultura Galega
29 de maio de 2026
A USC convoca os Premios á Calidade Lingüística para recoñecer os mellores traballos académicos escritos e defendidos en galego, incluíndo cursos de grao, TFG e TFM, coa finalidade de promover un uso rigoroso da lingua entre o estudantado. Establécense quince premios de 150 euros, acompañados de diplomas, distribuídos entre as principais áreas de coñecemento. Os prazos de presentación son o 31 de xullo para traballos de grao e o 30 de setembro para TFG e TFM.
28 de maio de 2026
O colexio Poeta Uxío Novoneyra, de Folgoso do Courel, recibiu a cualificación de «excelente» polo proxecto «Palabra no tempo», centrado na recuperación do léxico tradicional da serra. O recoñecemento inclúe unha achega de 2000 euros, certificación para o profesorado e difusión institucional. A iniciativa permitiu recompilar 370 palabras e expresións da comarca, algunhas delas ameazadas pola perda de transmisión xeracional, e deu lugar a materiais didácticos e a un dicionario patrimonial.
28 de maio de 2026
O Goberno vasco activou a Rede de Empresas Lanera nun encontro celebrado no Parque Tecnolóxico de Áraba, ao que se sumaron arredor de 80 compañías. A iniciativa procura crear unha comunidade empresarial comprometida co impulso do éuscaro no ámbito laboral, con espazos de colaboración, recursos compartidos e medidas adaptadas a cada realidade. Tras unha fase de diagnóstico con achegas de máis de 300 axentes e máis de 600 experiencias identificadas, o proxecto abre agora unha nova etapa para reforzar o uso da lingua no tecido socioeconómico.
28 de maio de 2026
O Concello de Donostia presentou o Plan estratéxico para a promoción do éuscaro 2026-2036, unha folla de ruta que pretende converter o coñecemento da lingua nun uso real e cotián. O alcalde, Jon Insausti, salientou que o reto consiste en lograr que a cidadanía viva con naturalidade en éuscaro, ao tempo que reivindicou a lingua como ferramenta de cohesión nunha cidade diversa.
28 de maio de 2026
A Universidade de Vigo recoñeceu a Escola de Enxeñaría de Minas e Enerxía co distintivo de galeguización Gal Ego 2026, que premia o centro máis comprometido coa promoción do galego. O selo terá unha vixencia de catro anos e irá acompañado dunha achega de 3000 euros para desenvolver novas actividades de dinamización lingüística.
Fonte: Consello da Cultura Galega
27 de maio de 2026
A illa galesa de Anglesey volve acoller o Urdd Eisteddfod, un dos maiores festivais xuvenís de artes, cultura e literatura en lingua galesa de Europa, por primeira vez en máis de dúas décadas. O evento reúne milleiros de mozas e mozos de todo Gales para participar en competicións e actividades culturais en galés.
Fonte: ITV
27 de maio de 2026
O químico Owain Beynon, primeira persoa en completar un doutoramento en Química integramente en galés, participa na organización dun novo congreso científico en lingua galesa na Universidade de Cardiff. A iniciativa busca normalizar o uso do galés no ámbito científico e fomentar a investigación académica nesta lingua.
Fonte: Nation Cymru
27 de maio de 2026
A Generalitat fixo balance do primeiro ano do Pacto Nacional pola Lingua cunha valoración positiva e anunciou a creación da Oficina de Protección dos Dereitos Lingüísticos para coordinar queixas e denuncias por discriminación. Segundo o Goberno, xa se completou o 62 % das medidas previstas, con avances salientables na oferta de cursos de catalán, na supervisión dos plans lingüísticos educativos e nas actuacións da Axencia Catalá de Consumo.
Boletín
Subscríbase ao boletín
