Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A asesora lingüística e tradutora Rosa Moledo é a persoa galardoada este ano co Premio de Honra Fernando Rey dos XXIV Premios Mestre Mateo do Audiovisual Galego pola súa achega fundamental á calidade das producións de cine, televisión e plataformas.
Fonte: O Portal da Lingua Galega
A Universidade da Coruña (UDC) ten o galego como lingua de uso preferente na administración, conforme aos seus estatutos. Segundo o responsable do Servizo de Normalización Lingüística, o galego é habitual na comunicación institucional e nas redes sociais, especialmente no ámbito administrativo. No ámbito da docencia, os datos indican que só un 10 % do profesorado utiliza o galego de maneira habitual, e o proceso de internacionalización e a presenza do inglés afectan á situación desta lingua na UDC.
O proxecto «Palabra no tempo» busca recuperar e preservar o léxico tradicional do municipio de Folgoso do Courel. A iniciativa, na que participa o colexio público Poeta Uxío Novoneyra, facilita a colaboración cidadá para recompilar voces e expresións que corren o risco de desaparecer. As persoas poden colaborar mediante cuestionarios en formato dixital ou físico, e a idea é que o alumnado aprenda e manteña vivas estas palabras.
Máis da metade das pequenas e medianas empresas de Cataluña consideran que o coñecemento do catalán é un requisito na contratación, unha cifra que aumenta seis puntos respecto ao ano anterior. A pesar de que o uso desta lingua é amplo entre as empresas, especialmente no sector servizos, tamén se observa un retroceso no seu emprego, especialmente ao adaptarse ás preferencias lingüísticas da clientela. A presencia do catalán nas pemes é especialmente forte na comunicación escrita e nas páxinas web, aínda que a súa utilización diminúe desde 2012.
O presidente do Principado presentou a Estratexia de Normalización do Asturiano e do Eonaviego 2026-2030, un plan elaborado tras unha exhaustiva análise sociolingüística e cultural. A estratexia establece obxectivos e directrices para promover o uso das linguas propias e garantir os dereitos lingüísticos e culturais da cidadanía. Divídese en cinco grandes áreas: a Administración, a transmisión interxeracional, a cultura e o deporte, a economía e a sociedade, e a proxección internacional.
A cantante sueca Katarina Barruk está a levar o saami de Ume, unha das linguas indíxenas máis ameazadas de Europa, con menos de trinta falantes, aos escenarios internacionais. A artista emprega exclusivamente esta lingua nas súas composicións, combinando sonoridades contemporáneas co joik tradicional saami.
Fonte: CN Traveler
Portugal estivo presente na primeira edición da Semana do Multilingüismo de Bruxelas, onde, da man da Embaixada de Portugal en Bélxica e do Instituto Camões, instalou un expositor para promocionar a lingua portuguesa e a súa cultura, reivindicando o valor da diversidade lingüística no ámbito europeo.
Fonte: Bomdia
O Concello de Irún impulsa unha nova edición do Mes do Éuscaro, iniciativa coa que procura reforzar o uso e a motivación pola lingua entre a mocidade. Baixo o lema «Klik euskarari!», o programa inclúe representacións teatrais, a publicación de creacións do alumnado na revista Irunero e a celebración dun Mintzodromo Gaztea no Espazo Palmera Montero.
A Generalitat de Catalunya incorporou os primeiros dez ditados en liña autocorrixibles en alguerés, nun fito que amplía os recursos formativos desta variedade do catalán. A iniciativa reforza a colaboración co Alguer e aposta por ofrecer materiais gratuítos e adaptados ás distintas modalidades da lingua. Con esta incorporación, o recurso consolida o seu papel como ferramenta didáctica de referencia, con millóns de consultas anuais.
A entidade menorquina Fem-ho en Català logrou que o Concello anule a licitación dos novos rótulos viarios que prevía formatos bilingües. Tras o recurso presentado en decembro, os servizos xurídicos municipais concluíron que a sinalización debe axustarse á normativa vixente, que establece a denominación exclusivamente en catalán.
Subscríbase ao boletín
