Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O presidente do Brasil, Luiz Inácio Lula da Silva, sancionou unha lei que impide o uso de formas de linguaxe neutra, tal como “todes", en todos os niveis da administración pública. A normativa obriga os órganos públicos a utilizaren a normativa culta da lingua portuguesa, baseándose no Vocabulario Ortográfico da Lingua Portuguesa (Volp) e no Acordo Ortográfico da Lingua Portuguesa.
Fonte: Gazeta do Povo
O Concello de Pamplona traballa na elaboración do novo Plan de normalización lingüística para reforzar o uso e o prestixio social do éuscaro. O proxecto, que se desenvolverá ata novembro de 2026, comezará cun diagnóstico sociolingüístico que servirá de base para o deseño dun plan dirixido a ampliar a presenza da lingua tanto na cidade como na propia administración. A iniciativa incluirá unha estratexia de comunicación e a creación dun consello municipal do éuscaro, encargado do seguimento e avaliación das medidas.
A creación de contidos en catalán nas redes sociais medrou de maneira significativa: ata outubro rexistráronse 115 800 publicacións, un 26 % máis que no mesmo período do ano pasado, segundo os datos presentados na terceira edición de L’Aferrada 2025 en Palma. Nesta xornada, profesionais e institucións insistiron na importancia de fortalecer a presenza do catalán no ámbito dixital para xerar referentes e normalizar o seu uso.
Google presenta Gemini 3, o seu novo modelo de IA, concibido para mellorar o razoamento avanzado e a interpretación de contextos complexos en tarefas creativas ou analíticas. A súa chegada amplía o ecosistema de produtos baseados en IA de Google e inclúe unha novidade salientable: Gemini 3 Pro está dispoñible en 30 novos idiomas, entre eles o galego, co obxectivo de facilitar o seu uso para aprender, crear e planificar no día a día.
O conselleiro de Cultura, Lingua e Xuventude, José López Campos, visitou o set de rodaxe da serie televisiva Pensión incompleta, instalado na compostelá praza da Quintana como un dos escenarios galegos desta coprodución entre Galicia, Cataluña e País Vasco. O titular de Cultura do Goberno galego felicitou persoalmente o equipo polo avance do proxecto, subvencionado pola Xunta, do que destacou o seu carácter pioneiro como primeira serie rodada simultaneamente nas catro linguas oficiais do Estado.
Un estudo da cidade de Helsinki conclúe que as persoas con orixe estranxeira en Finlandia ven as súas posibilidades laborais e de integración seriamente afectadas pola falta de competencias en finés ou sueco. Sinálase ademais que o acceso á formación lingüística non é uniforme polo que as oportunidades son especialmente limitadas.
Fonte: YLE
Katrín Jakobsdóttir, exprimeira ministra de Islandia, afirma que a lingua islandesa, falada por apenas 350 000 persoas, podería desaparecer nunha ou dúas xeracións se non se actúa, debido ao dominio crecente dos medios en inglés e ao uso da intelixencia artificial.
Fonte: The Guardian
A Academia Valenciana da Lingua e o Concello da Vall d’Uixó selaron un convenio para a promoción social e institucional do valenciano. O acordo, con vixencia inicial de catro anos, compromete o concello a actualizar o nomenclátor, ampliar a sinalización e os servizos en valenciano, crear unha oficina de promoción lingüística e aumentar a oferta cultural nesta lingua. Pola súa banda, a AVL ofrecerá asesoramento, materiais e colaboración en programas educativos e culturais.
O Termcat e o Departamento de Saúde puxeron en marcha unha campaña para favorecer o uso do catalán nos espazos sanitarios mediante a difusión de carteis e vídeos que recollen vocabulario básico do corpo humano, do material médico e do equipamento clínico. Estes recursos, destinados a profesionais e pacientes, repartiranse en centros sanitarios e tamén estarán dispoñibles como infografías interactivas e vídeos en liña.
A Real Academia Galega concedeulle ao CEIP Milladoiro de Malpica o I Premio Na lingua que eu falo, destinado a distinguir iniciativas que reforzan o uso do galego na infancia. A institución destacou que a comunidade educativa deste centro representa un modelo de creatividade, orgullo lingüístico e transmisión natural da lingua.
Subscríbase ao boletín
