O Concello de Carnota aprobou e publicou no BOP a súa Ordenanza reguladora do uso do galego, que establece os criterios lingüísticos aplicables á administración local, ás entidades dependentes e ás empresas concesionarias cando actúen por conta municipal. A norma fixa o marco de utilización da lingua propia na actividade institucional e nos servizos públicos e, ademais, prevé a creación dun servizo de normalización lingüística. Con esta iniciativa, o Concello procura reforzar a presenza da lingua no ámbito municipal.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
25 de febreiro de 2026
25 de febreiro de 2026
Centros educativos, ANPA, clubs, comercio e bibliotecas súmanse en Redondela ao reto «Unha semaniña enteira», que promove falar galego de maneira continuada entre o 20 e o 27 de febreiro, coincidindo co Día de Rosalía. A campaña, presentada no IES Chapela, contará con actividades culturais e implicará tamén a hostalaría e o tecido empresarial, que distribuirán material divulgativo e organizarán iniciativas temáticas.
24 de febreiro de 2026
Os ministerios de Asuntos Exteriores de Letonia e Estonia anunciaron a convocatoria dun premio anual para recoñecer iniciativas que promovan o letón e o estoniano nos dous países. O galardón, dotado con 5 000 euros, distinguirá persoas ou proxectos destacados na difusión e ensino destas linguas.
24 de febreiro de 2026
O uso do catalán nas actuacións da quenda de oficio en Cataluña medrou un 15 % en 2025, ata superar as 17 600 intervencións, máis do dobre ca en 2021, cando se retomou o plan de fomento lingüístico na xustiza. Tamén aumentou o número de profesionais adheridos ao programa, que xa representan máis dun cuarto do total, cun incremento próximo ao 50 % en catro anos.
Fonte: Diari de la Llengua
24 de febreiro de 2026
A Universidade Central de Venezuela decidiu suspender temporalmente a admisión de alumnado na cátedra de portugués ante a carencia de aulas dispoñibles para impartir as clases. A medida chega malia o elevado interese polo curso, que nos últimos anos figuraba entre os máis solicitados.
Fonte: Notícias ao Minuto
24 de febreiro de 2026
O Plan de fortalecemento do catalán no sistema universitario e de investigación pechou a súa primeira fase cun cumprimento superior ao 80 % dos obxectivos previstos, segundo a comisión de seguimento. A Generalitat inicia agora a súa actualización para o período 2026-2030, co propósito de compatibilizar internacionalización e normalización lingüística, así como de integrar o impacto da intelixencia artificial. Entre as prioridades figuran ampliar a docencia en catalán, reforzar a acollida lingüística e consolidar a súa presenza na investigación.
24 de febreiro de 2026
O delegado territorial da Xunta en Lugo, Javier Arias, e o secretario xeral da Lingua, Valentín García, participaron na capital lucense na presentación da primeira edición dos Premios Dalle Like, unha iniciativa que conta coa colaboración da Xunta e que busca recoñecer o talento galego no ámbito dixital e das redes sociais.
24 de febreiro de 2026
O secretario xeral da Lingua, Valentín García, participou no acto institucional que acolleu o Panteón de Galegas e Galegos Ilustres con motivo do Día de Rosalía, en San Domingos de Bonaval.
Fonte: O Portal da Lingua Galega
23 de febreiro de 2026
A Universidade do Porto acolleu o coloquio Lhéngua mirandesa: tradiçon i feturo, no marco do Día Internacional da Lingua Materna. O evento reuniu investigadores e expertos para debater o patrimonio, a vitalidade actual e a importancia da lingua mirandesa, así como a súa promoción e preservación para o futuro.
23 de febreiro de 2026
Segundo un estudo recente sobre o uso das linguas na provincia canadense do Quebec, a presencia do francés segue estable nalgúns ámbitos sobre todo nas esferas privadas, cunha maioría de residentes que declaran usar o francés tamén fóra do fogar. Con todo, en rexións urbanas como Montreal, o inglés e o uso mixto (francés e inglés) son máis visibles, o que suxire tendencias cambiantes no panorama sociolingüístico.
Fonte: Montreal Gazette
Boletín
Subscríbase ao boletín
