O suahili gaña novo prestixio internacional tras ser recoñecido pola Unesco como unha das súas linguas oficiais de traballo durante a 43.ª Conferencia Xeral celebrada en Samarcanda, Uzbekistán.
Fonte: UNESCO
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
14 de novembro de 2025
O Diario Oficial de Galicia publicou a resolución da Secretaría Xeral de Medios da Xunta de Galicia da convocatoria do ano 2025 de axudas destinadas a empresas que realicen publicacións periódicas escritas integramente en galego.
Fonte: Consello da Cultura Galega
14 de novembro de 2025
O Consello Social da Lingua de Signos Catalá (LSC) celebrou unha nova sesión na que se avaliaron os avances do último ano e se presentaron as prioridades para 2026, cunha clara aposta por fortalecer a presenza e o recoñecemento social da LSC. Para o vindeiro ano prevese abrir novos espazos formativos, actualizar o vocabulario básico e avanzar cara á certificación oficial desta lingua.
Fonte: Generalitat de Catalunya
14 de novembro de 2025
O Departamento de Lingua do Concello de Santiago e a Cámara de Comercio convocan a vixésima sexta edición dos Premios Manuel Beiras, co lema «O galego é o punto». Estes galardóns recoñecen o uso do galego no sector empresarial compostelán nas categorías de «empresa cun uso continuado da lingua galega», «empresa de nova incorporación ao uso do galego» e «empresa innovadora no uso do galego».
Fonte: Consello da Cultura Galega
14 de novembro de 2025
O Goberno vasco celebrou o primeiro encontro público de LANERA, un proxecto destinado a reforzar a presenza do éuscaro no ámbito socioeconómico. No encontro participaron arredor de 125 representantes municipais e de axencias de desenvolvemento, que coincidiron en destacar o potencial do éuscaro neste sector. A intervención de diversas autoridades locais subliñou a importancia de avanzar cara a unha implantación efectiva da lingua nos espazos produtivos do territorio.
13 de novembro de 2025
O Concello de Barcelona comprométese a crear unha comisión interna destinada a garantir o cumprimento do seu regulamento sobre o uso do catalán. A comisionada Marta Salicrú defende a necesidade de reforzar a aplicación da normativa e de protexer os dereitos lingüísticos da cidadanía, ao tempo que anuncia que a comisión quedará formalmente constituída.
13 de novembro de 2025
O Goberno vasco aprobará dúas convocatorias de axudas destinadas a reforzar proxectos comunicativos en éuscaro, cun investimento total de 804 000 euros. A principal liña, dotada con 554 000 euros, apoiará a consolidación e expansión de publicacións impresas integramente en éuscaro, nunha aposta decidida por fortalecer os medios que utilizan esta lingua.
13 de novembro de 2025
O conselleiro de Cultura, Lingua e Xuventude, José López Campos, acompañado polo secretario xeral da Lingua, Valentín García, participou na Estrada no acto de entrega dos XXXV Premios San Martiño de Normalización Lingüística.
Fonte: O Portal da Lingua Galega
13 de novembro de 2025
O secretario xeral da Lingua, Valentín García, participou no acto conmemorativo do Día da Restauración da Memoria Lingüística de Galicia «En galego agora e sempre», celebrado na igrexa de San Pedro, no que se proclamou a Declaración de Bande pola lingua galega nos ritos funerarios.
Fonte: O Portal da Lingua Galega
12 de novembro de 2025
A nova presidenta de Irlanda, Catherine Connolly, falante nativa de irlandés, propón usar o gaélico como lingua de traballo da súa presidencia e reforzar a súa presenza na vida pública, nun momento de crecente recuperación e orgullo pola lingua.
Fonte: The Guardian
Boletín
Subscríbase ao boletín
