Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A 6.ª edición do Campus NPLD–Coppieters celebrouse os días 6 e 7 de novembro en Leeuwarden (Frisia, Países Baixos) e centrouse na produción audiovisual en linguas rexionais e minoritarias. O NPLD é unha rede europea que promove a diversidade lingüística. No encontro, a delegación da Generalitat de Cataluña destacou a importancia de reforzar a presenza do catalán nas plataformas de streaming.
Fonte: Generalitat de Catalunya
A poeta Paula Currás, nada en Cambre en 1996, resultou vencedora do XXXVIII Premio de Poesía Xosé María Pérez Parallé, co seu libro Vestiario, e obtén un galardón de 3.000 euros en metálico.
Fonte: Cultura galega
A plataforma Crónicas d’Asturies abriu a convocatoria da cuarta edición do seu certame anual de microrrelatos en asturiano, que ofrece un premio de 300 euros en libros. Os participantes poden presentar un único microrrelato ambientado en Asturias e escrito en asturiano en calquera das súas variedades.
Fonte: Europapress
O TERMCAT, Centro de Terminoloxía de Cataluña, celebrou os seus 40 anos cun acto onde se destacou o seu labor na normalización e actualización da lingua catalá, contribuíndo á creación de máis de 230.000 termos e ao uso do catalán en ámbitos científicos, tecnolóxicos e culturais.
Fonte: Generalitat de Catalunya
Na 20.ª edición da Festa Literaria Internacional de Pernambuco, que terá lugar en Recife do 13 ao 16 de novembro, presentarase o Manifesto da Lusofonía, un documento que promove a creación dunha Bienal da Lusofonia, iniciativa que reunirá escritores e artistas de todos os países e rexións de lingua portuguesa e reivindica o portugués como patrimonio común.
Fonte: e-Global
Coincidindo co 66.º cabodano do poeta e dramaturgo Ramón Cabanillas, o Museo Ramón Cabanillas de Cambados acolleu a inauguración da exposición O teatro de Ramón Cabanillas. Alento poético e fondura dramática.
Fonte: Real Academia Galega
A actriz María Vázquez foi distinguida co XXIII Premio Ramón Piñeiro, Facer País, concedido pola Asociación Cultural Val de Láncara. Este galardón recoñece cada ano o labor de persoas ou institucións comprometidas co desenvolvemento de Galicia, coa súa lingua e a súa cultura.
Fonte: Cultura galega
Como cada 5 de novembro, o mundo celebra o Día Internacional da Lingua Romaní, efeméride marcada pola Conferencia Xeral da UNESCO para fomentar a preservación da lingua e cultura romanís.
Fonte: Chajarí al día
O colectivo "Perquè visquin les nosses llengües", que agrupa as principais entidades que loitan polas linguas minorizadas en Francia, constitúese formalmente en asociación para reforzar a súa acción conxunta fronte ás políticas que ameazan a diversidade lingüística. A enquisa do Instituto Francés de Opinión Pública revela que o 77 % dos habitantes do Estado francés apoia o recoñecemento das linguas rexionais, unha cifra que sobe ao 87 % na Cataluña Norte.
Gonzalo Celorio (Cidade de México, 1948), director da Academia Mexicana da Lingua, foi galardoado co máximo recoñecemento da literatura en lingua española, o Premio Miguel de Cervantes 2025, que lle foi outorgado pola súa "obra literaria excepcional e labor intelectual con que contribuíu de forma profunda e sostida ao enriquecemento do idioma e da cultura hispánica".
Fonte: El Castellano
Subscríbase ao boletín
