Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Universidade do Miño volve apostar pola diversidade lingüística co acollemento de máis de 200 estudantes procedentes de 38 países, promovendo o diálogo intercultural e a visibilidade das linguas e culturas a través da educación.
Fonte: Mais Guimarães
A radiotelevisión pública de Polonia puxo en marcha unha versión en lingua romanesa do seu servizo informativo para a República Moldova co obxectivo de ofrecer información fiable, combater a desinformación e reforzar o acceso a contidos independentes para a poboación romanófona do país.
Fonte: Polskiego Radia
O Ministerio de Educación da República Moldova lanzou un programa nacional para mellorar a aprendizaxe da lingua romanesa entre 2026 e 2028. A iniciativa inclúe formación para docentes, novos materiais didácticos e medidas para reforzar a competencia lingüística do alumnado.
Fonte: Moldpres
Romanía porá en marcha cursos de lingua romanesa dirixidos a persoas estranxeiras, que se impartirán en Bucarest e a través do Instituto Cultural Romanés en distintos países. O obxectivo é facilitar a integración lingüística e cultural de residentes e estudantes internacionais.
Fonte: AGERPRES
O secretario xeral da Lingua, Valentín García, participou no Vello Cárcere no acto de presentación da obra Para que non estiñe a memoria das avoas, coa que a que a catedrática e doutora en Filoloxía Galega, especialista en toponimia, investigadora e escritora Xulia Marqués Valea homenaxea a memoria da pontenovesa Perfecta Ogaza Fontagordo.
O secretario xeral da Lingua, Valentín García, participou na presentación da V edición do Premio de Literatura Infantil Simbad para o Recordo e o Alzhéimer. Trátase dunha iniciativa impulsada pola Asociación Galega de Axuda aos Enfermos con Demencia Tipo Alzhéimer que conta co apoio da Xunta de Galicia, co obxectivo de sensibilizar sobre esta doenza entre a cativada e establecer vínculos a través da literatura entre as distintas xeracións.
O Concello de Olot impulsou unha campaña para reforzar o uso do catalán no comercio local, cun balance amplamente positivo. A maioría dos establecementos adapta xa a sinalización, a documentación e a atención á clientela á normativa vixente. O seguimento e o asesoramento personalizado permitiron corrixir máis da metade das incidencias detectadas inicialmente. As melloras resultan especialmente visibles en varios sectores comerciais, aínda que persisten dificultades puntuais nalgúns ámbitos.
Diversas asociacións culturais e persoas voluntarias manteñen viva a lingua aragonesa mediante aulas, activismo social e creación de contidos, malia a escasa implicación institucional. O idioma conta cun número moi reducido de falantes habituais e sofre unha grave falta de transmisión xeracional, situación que o sitúa en serio risco de desaparición. A acción comunitaria céntrase tanto na aprendizaxe práctica como na reivindicación da súa lexitimidade histórica.
O IVAP abriu a primeira convocatoria de 2026 para acreditar coñecementos de éuscaro entre o persoal de Osakidetza, cun prazo de inscrición aberto ata o 16 de febreiro. A convocatoria incorpora cambios nos niveis de acreditación, coa ampliación dos perfís e a súa adaptación ao marco europeo de referencia das linguas.
Fonte: SATSE
A Deputación de Pontevedra aprobou un programa de axudas por 300.000 euros para promover o uso do galego na Administración local e na creación cultural. Por unha banda, destínase 200.000 € a apoiar a posta en marcha, mantemento e reforzo dos servizos de normalización lingüística en concellos pequenos e entidades locais. O resto, 100.000 €, oriéntase a facilitar a edición de publicacións en galego impulsadas por entidades sen ánimo de lucro.
Subscríbase ao boletín
