A xornada "Comunica en Galego", organizada pola Facultade de Comunicación da Universidade de Vigo, centrouse no uso do galego en contidos políticos e reivindicativos. O obxectivo foi amosarlle ao alumnado que a lingua galega é válida para crear todo tipo de contidos, tamén en ámbitos políticos, sociais e de denuncia. Durante o evento, resaltouse a importancia de utilizar o galego como ferramenta para destacar en plataformas dixitais e para promover a implicación social coa lingua.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
28 de outubro de 2025
28 de outubro de 2025
A Academia Aragonesa da Lingua presentou o primeiro volume da súa nova revista científica, Revista de l'Academia Aragonesa de la Lengua (RAAL), que ten como obxectivo fomentar a investigación e debate sobre o aragonés e o catalán en Aragón, así como difundir e dignificar estas linguas. Esta publicación de acceso aberto recolle estudos de especialistas en áreas como sociolingüística, lexicografía, paremioloxía e dialectoloxía e estará dispoñible na web da institución.
28 de outubro de 2025
As entidades Accent Obert, Òmnium Cultural, Plataforma per la Llengua e Softcatalà lanzaron a campaña «Configura els teus dispositius en la nostra llengua» para fomentar o uso do catalán no ámbito dixital. A iniciativa anima a configurar teléfonos, ordenadores e outros dispositivos neste idioma, o que aumenta a súa visibilidade e exerce presión sobre as empresas para ampliar os contidos dispoñibles.
28 de outubro de 2025
A Asociación de Apoio aos Traballadores Inmigrantes (ASTI, polas súas siglas en francés) alerta que, mesmo sendo o francés unha das tres linguas oficiais de Luxemburgo, o seu uso está a decaer nos ámbitos escolares, universitarios e de servizos públicos. Este descenso preocupa pola posible perda de competencia nunha das linguas administrativas do país.
Fonte: Contacto
28 de outubro de 2025
Ottawa, capital do Canadá, acolle a celebración da primeira edición dun festival de curtametraxes en lingua portuguesa, organizado polas embaixadas de Portugal e do Brasil (coa axuda do Consulado xeral de Angola). O evento, de entrada gratuíta, ten como obxectivo promover o talento de realizadores dos países lusófonos e achegar as comunidades residentes no Canadá á produción cinematográfica contemporánea.
Fonte: Bom dia
28 de outubro de 2025
O 8 de novembro celebrarase o acto oficial no que se lerá a Declaración de Bande pola lingua galega nos actos de memoria, no que varios alcaldes e alcaldesas se comprometerán a promover a restauración da memoria lingüística nos seus concellos. A iniciativa busca visibilizar a importancia de empregar o galego nos ritos funerarios e nas últimas vontades.
Fonte: Consello da Cultura Galega
27 de outubro de 2025
A Institución Francesc de Borja Moll iniciou a dixitalización do Diccionari català-valencià-balear, un proxecto que permitirá ofrecer acceso público e gratuíto ao contido do dicionario cun sistema avanzado de busca e conexión coas súas fontes orixinais.
Fonte: Diari de la Llengua
27 de outubro de 2025
A asociación Pantailak Euskaraz alertou no Parlamento Vasco da escasísima presenza do éuscaro no cinema e nas plataformas de streaming, onde apenas o 1 % das proxeccións e contidos están nesta lingua. A entidade considera que esta situación prexudica o uso e a calidade do idioma entre a mocidade e reclama máis recursos para producións propias e dobraxes, un marco legal específico e a creación dun consello audiovisual vasco. Tamén propón campañas institucionais que animen a consumir contido en éuscaro e visibilicen os novos subtitulados e dobrados.
27 de outubro de 2025
O Concello de Ames convoca a oitava edición dos Premios Lingua e Empresa, destinados a recoñecer o uso do galego no ámbito económico local e a promover a súa presenza nas empresas do municipio. Con dúas categorías e unha dotación total de 3000 euros, os galardóns valoran o emprego da lingua na comunicación interna, a publicidade, a sinalización e a atención á clientela.
27 de outubro de 2025
A empresa tecnolóxica Meta ampliou as súas ferramentas de tradución con intelixencia artificial para que os contidos poidan chegar a públicos de diferentes linguas. Tras introducir a tradución bidireccional entre inglés e español, engadiu agora o hindi e o portugués, o que reforza a conexión coa lusofonía.
Fonte: Código Cero
Boletín
Subscríbase ao boletín
