Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Goberno das Illas Baleares anuncia unha nova convocatoria de axudas para os medios escritos e audiovisuais comprometidos co uso do catalán, para contribuír a responder ás súas necesidades e fomentar a presenza desta lingua no panorama comunicativo do arquipélago.
Fonte: Crónica Balear
Un catedrático e unha investigadora da Universidade Autónoma de Barcelona afirman que se trata do texto “Llibre dels jutges” do século XI, que foi copiado do latín entre os anos 1060 e 1080. Despois da súa investigación durante os últimos anos en arquivos de España, Francia, Italia e do Vaticano, tamén aseguran que a formación da lingua catalá se sitúa no século IV.
Fonte: La Vanguardia
Os ministerios de Educación e do Ensino Superior de Timor Leste queren que a lingua portuguesa se converta obrigatoriamente no principal idioma de instrución no ensino e que as outras linguas sexan idiomas auxiliares.
Fonte: SAPO
Un grupo de especialistas sobre a lingua illada ainu do Xapón publicou Handbook of the Ainu Language, o máis completo compendio deste idioma ameazado que existe até o momento e que esperan que poida servir para revitalizalo.
Fonte: La Prensa Latina
O concurso de vídeos «Vémolo Nós», do que se celebra a primeira edición, ten como obxectivo impulsar a produción e a difusión de vídeos curtos fomenten o uso do galego como lingua de divulgación científica que sexan de utilidade para a docencia no ámbito universitario.
O secretario xeral de Política Lingüística, Valentín García, participou no primeiro encontro que reuniu unha ampla representación do alumnado e do profesorado participante na V edición do programa de dinamización lingüística «21 días co galego e+», promovido pola Xunta co obxectivo de estimular o uso oral da lingua galega entre a xente nova tanto dentro como fóra dos centros de ensino.
O texto lexislativo da comunidade xa está dispoñible en aragonés co nome de Codigo d'o Dreito Foral d'Aragó. Esta versión foi editada a través dun proxecto impulsado pola institución do Justicia de Aragón e a Dirección Xeral de Política Lingüística e vai permitir que a comunicación chegue a todos os cidadáns.
Fonte: El Periódico de Aragón
O obxectivo deste rexistro idiomático é poder crear unha oferta integral en éuscaro dos servizos sanitarios nos diferentes niveis de asistencia. A cidadanía poderá rexistrar a lingua na que prefire relacionarse cos seus profesionais e recibir comunicacións a través da nova Carpeta de Saúde ou no seu centro de saúde.
Fonte: Gobierno Vasco
O Museo da Lingua Portuguesa de São Paulo, pertencente á Secretaría da Cultura e Economía Creativa do Goberno do Estado de São Paulo, abriu unha convocatoria para seleccionar dúas persoas que desenvolvan traballos de investigación sobre linguas indíxenas durante o ano 2023.
Fonte: Museu da Língua Portuguesa
A APLEC (Asociación para o Ensino do Catalán na Cataluña Norte) reclamou que se manteñan un total de dúas horas de ensino de catalán nas escolas da rexión francesa da Cataluña Norte. A agrupación constatou que hai escolas que queren que o ensino do catalán fique reducido a unha hora semanal.
Fonte: El Nacional
Subscríbase ao boletín
