A Asociación de Medios en Galego, a provedora de servizos de Dinahosting e a Asociación PuntoGal organizan a campaña «Subscríbete ao galego», coa que pretenden incrementar e apoiar a comunidade de creación de contido en galego e impulsar o uso desta lingua en internet.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
03 de maio de 2023
03 de maio de 2023
O sábado día 6 de maio celebrarase en Ames a cuarta edición da Festa do Apego cun programa de actividades que inclúe contos, xogos, música, monicreques, obradoiros etc. Esta celebración enmárcase na iniciativa Apego, na que participan varios concellos que apostan polo impulso da transmisión do galego como lingua inicial.
02 de maio de 2023
As persoas maiores de 16 anos que estean empadroadas na cidade poderán recibir axudas económicas para a realización de cursos de éuscaro en dous períodos (entre outubro de 2022 e xuño de 2023 e durante o verán) e en diferentes centros autorizados.
Fonte: Ayuntamiento de Pamplona
02 de maio de 2023
O obxectivo do colectivo cultural é conseguir que a propia institución comarcal poida asesorar os concellos e as xuntas veciñais para protexer a singularidade cultural e lingüística do galego. Tamén propón a sinatura dun protocolo de colaboración coa Xunta de Galicia para a implantación deste servizo.
Fonte: Diario de León
02 de maio de 2023
O alumnado do IES Leiras Pulpeiro elaborou o Glosario caló-galego, cuxo obxectivo é difundir a cultura xitana entre a comunidade educativa a través dunha listaxe de palabras ou frases na lingua caló coas súas equivalencias en galego.
Fonte: Consello da Cultura Galega
02 de maio de 2023
O Premio de Tradución para o Galego, organizado pola Facultade de Filoloxía e o Servizo de Normalización Lingüística, diríxese ao alumnado da Universidade da Coruña.
Fonte: Consello da Cultura Galega
02 de maio de 2023
A Consellería de Cultura, Educación, FP e Universidades colabora un ano máis coa Carreira Camiño das Letras, unha proba cultural e deportiva impulsada por Xurdir que ten por obxectivo celebrar as Letras Galegas e poñer en valor o Camiño de Santiago a través do deporte.
02 de maio de 2023
O Diario Oficial de Galicia (DOG) publica as subvencións para a edición en lingua galega de recursos didácticos curriculares para niveis non universitarios. Trátase dunha liña de axudas destinada á edición de materiais en formato impreso ou dixital á que a Consellería de Cultura, Educación, FP e Universidades destina durante este ano 200 000 euros.
02 de maio de 2023
A Xunta de Galicia anunciou os nomes dos gañadores das mellores declaracións de amor en galego presentadas nesta undécima edición do certame Lingua de namorar. Un total de 2615 persoas (99 mozas e mozos e 2516 votantes) participaron neste concurso que procura dinamizar o uso da lingua galega entre a xuventude, tanto nas súas relacións persoais como na internet.
02 de maio de 2023
O próximo 5 de maio, o primeiro ministro de Portugal, António Costa, entregará o Premio Camões de 2021 que fora outorgado á escritora mozambicana Paulina Chiziane, autora do libro Niketeche: Uma História de Poligamia.
Fonte: Público
Boletín
Subscríbase ao boletín
