Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Concello de Redondela denunciou que dende hai tempo non está dispoñible a versión en galego do Boletín Oficial do Estado (BOE), polo que lle trasladou ao Ministerio da Presidencia unha solicitude para que rectifique esta carencia.
Fonte: Radio Redondela
O equipo formado por María Santalla Martínez e Daniel Alejandro Santiago Mayoral fixéronse co galardón do certame Xuventude Crea 2022 na especialidade de Creación de videoxogos coa proposta ‘K.I.W.I’. A través deste programa, o Executivo autonómico recoñece o talento e a creatividade da mocidade galega en distintas categorías.
O secretario xeral de Política Lingüística, Valentín García, participou no Pazo de San Roque no acto de entrega da última edición dos certames Novos Poliedros e Inventa en galego, convocados co gallo do Mes da Ciencia en galego por Igaciencia -Institución Galega da Ciencia- coa colaboración da Xunta de Galicia para promover entre a mocidade a innovación tecnolóxica en lingua galega.
A UNESCO celebrará na segunda semana de decembro o Decenio Internacional das Linguas Indíxenas (2022-2032) e presentará un plan de acción para concienciar sobre a perda dramática das linguas nativas e a urxente necesidade de preservalas, revitalizalas e celebralas.
Fonte: UNESCO
O Concello de Silleda organiza unha nova edición de Silledagasalla, un certame de Nadal organizado en colaboración cos centros educativos e o sector do comercio da vila co que se quere fomentar o galego a través de adhesivos con lemas nesta lingua que se reparten nos establecementos comerciais para acompañar os agasallos.
Segundo unha enquisa do Goberno da Comunidade Valenciana sobre o coñecemento e o uso social do valenciano en diferentes ámbitos sociais, produciuse un aumento xeneralizado da competencia nesta lingua. Así, subiu en seis puntos a porcentaxe de persoas que o saben escribir; case cinco, a das que o saben ler; e máis de tres, a das que o entenden.
Un total de 200 alumnos e 20 profesores de 3º e 4º de ESO participará nos programas de intercambio con alumnado de centros educativos franceses das rexións académicas Hauts-de-France (a través do programa Galimiens) e Bretagne.
Fonte: Xunta de Galicia
A campaña, que ten como lema ‘Mou la llengua’, invita os falantes de catalán a non cambiar de lingua de forma innecesaria e sinala a importancia de que a empreguen en todas as ocasións posibles.
Fonte: Nou Diari
A escritora portuguesa Alexandra Lucas Coelho, o autor mozambicano João Paulo Borges Coelho e a escritora brasileira Micheliny Verunschk foron os galardoados co Premio Oceanos 2022 de literatura en lingua portuguesa.
Fonte: Diário do Nordeste
Comezou a votación para escoller a palabra do ano 2022 en Portugal e Angola. A lista de dez palabras foi elaborada pola editorial Porto Editora.
Fonte: Diário de Notícias
Subscríbase ao boletín
