Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Os 28 servizos de éuscaro das Administracións locais de Navarra queren cunha nova campaña difundir a web elaide.eus, dirixida principalmente a estudantes de éuscaro, na que se poden encontrar recursos e información interesante para aprender e poder vivir nesta lingua.
Fonte: Noticias de Navarra
O XXVI Premio Literario San Clemente Rosalía-Abanca, que outorga unha representación do alumnado de segundo de bacharelato dunha decena de institutos de Galicia, foi para a novela Flores de ferro, de María Rei Vila na categoría de lingua galega.
Fonte: Culturagalega.org
O Concello de Manacor aprobou unhas cláusulas para que o catalán se converta en requisito técnico para calquera contratación de servizos, obras ou subministracións. Por este motivo, creou un novo servizo de apoio lingüístico á contratación, co obxectivo de facer efectivo o uso público desta lingua.
Fonte: Diario de Mallorca
O Comité para as Comunidades de Fala Galesa revelou que a adquisición de segundas residencias por persoas anglófonas en certos lugares do País de Gales e os efectos derivados do Brexit poden estar afectando o galés como lingua das comunidades locais e podería pór en risco a súa supervivencia.
Fonte: The Guardian
O Museo da Lingua Portuguesa de São Paulo vai contar con programación especial e entradas de balde por causa da conmemoración do Mes da Conciencia Negra.
Fonte: Mundo Negro
A Asociación Amics del Chapurriau quere que o chapurriau se recoñeza como unha das modalidades lingüísticas aragonesas. Por este motivo, remitiulle á institución do Justicia de Aragón unha queixa despois de que hai uns meses solicitasen este recoñecemento
Fonte: La Comarca
O Departamento de Saúde mostrou o seu apoio á iniciativa Euskaraldia e ao impulso do éuscaro, polo que crearán 26 “Arigunes”, espazos para expresarse nesta lingua co obxectivo de que esta gañe terreo e se logre un equilibrio entre os dous idiomas oficiais.
Fonte: Gobierno Vasco
Cumieira das Letras é o título desta nova publicación, unha revista de periodicidade anual coa que se pretende dar a coñecer traballos científicos en galego sobre a lingua, literatura e cultura galegas.
Fonte: Universidade de Vigo
O programa Berbalagun está dirixido a persoas que queiran aprender ou perfeccionar o seu éuscaro falado nun ambiente distendido, a través de reunións de grupos reducidos no tempo de lecer das persoas participantes.
Fonte: El Diario Vasco
O Concurso de Poesía en Lingua Galega Xaquina Trillo está dirixido este ano ao alumnado de bacharelato de toda Galicia ou mesmo de fóra. Os traballos, que se poden presentar ata o 30 de novembro, deben estar escritos en galego e a dotación económica increméntase a 300, 200 e 100 euros.
Fonte: Faro de Vigo
Subscríbase ao boletín
