Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
As próximas estreas en catalán das películas de Disney estarán dispoñibles nalgunhas das principais plataformas de vídeo (Prime Video, Apple TV app, Google Play e Rakuten TV), o que contribuirá á normalización do mercado audiovisual nesta lingua.
Fonte: Generalitat de Catalunya
Os concellos de Ames, Carballo, Pontevedra, Santiago de Compostela e Teo presentaron a sexta edición de Enreguéifate, un certame que ten como obxectivo promover a regueifa como forma de improvisación oral e para fomentar o uso do galego.
Fonte: Consello da Cultura Galega
O Concello de Boal (Asturias) acolleu a presentación do Informe lingüístico del Eo-Navia. Sen fronteiras: galego de Asturias, un documento divulgativo que ofrece datos sobre a realidade lingüística e sociolingüística actual desta área.
Fonte: Consello da Cultura Galega
O secretario xeral de Política Lingüística, Valentín García, participou na presentación da obra infantil O cabaliño de buxo, un clásico de Xosé Neira Vilas editado pola Editorial Galaxia co apoio da Xunta e que pasa a formar parte da colección infantil e xuvenil Árbore da editorial galega.
Fonte: O Portal da Lingua Galega
Nun acto en Dharamshala (India), a Rede Internacional polo Tíbet e o Partido Nacional Democrático do Tíbet solicitaron aos líderes do G7 que presionen o Goberno da China para que deteña a opresión contra a lingua e cultura tibetanas no Tíbet.
Fonte: The Tibet Post
O Goberno do País de Gales quere reforzar e apoiar as comunidades de fala galesa coa figura dos "embaixadores da lingua" que terán a función de integrar persoas foráneas que decidan instalarse en Gales.
Fonte: BBC
A canle de televisión Record TV presentou a campaña "Falamos a mesma Língua" coa intención de reforzar os lazos que unen os diferentes acentos e variedades da lingua portuguesa.
Fonte: Record TV Europa
O certame "Tíralle da lingua" está dirixido á comunidade educativa e ten como obxectivo normalizar o uso oral do galego e contribuír a que esta lingua se converta en instrumento normal de comunicación e creación de historias no ámbito educativo.
Fonte: Consello da Cultura Galega
A maioría sindical do ensino vasco, así como outras entidades demandan que a futura lei de educación sitúe o éuscaro como lingua de ensinanza e aprendizaxe e apostan por un modelo lingüístico xeneralizado e inclusivo de maneira que se garanta a igualdade e a cohesión social.
Fonte: Noticias de Gipuzkoa
Entre as iniciativas destacan, por unha banda, a campaña «Esperant llegint!», pola que se distribuirán libros de autores valencianos en lugares con zonas de agarda (clínicas dentais, notarías...); ou, por outra, a repartición entre os centros educativos de infantil e de primaria dun xogo de cartas para recuperar a tradición dos monstros valencianos da festividade de Todos os Santos.
Subscríbase ao boletín
