Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
As cerimonias de presentación dalgúns ministerios do novo Goberno de Lula da Silva evidenciaron un uso crecente da linguaxe inclusiva, por exemplo a forma "todes", que é utilizada para se referir a persoas que non se identifican co xénero masculino nin co feminino.
Fonte: Estado de Minas
Co 53 % dos votos, "guerra" foi escollida como palabra do ano 2022 en portugués nun certame organizado pola Porto Editora.
Fonte: Público
Co lema «Euskara, bihotzetik ahora» (O éuscaro do corazón á boca), un mural urbano na rúa Bizkai de Galdakao ten como obxectivo impulsar o uso do éuscaro na vida diaria.
Fonte: Deia
Coincidindo coas festas de Nadal, cobran especial relevancia propostas lúdicas en galego e con temática galega, con varios xogos e xoguetes que abranguen diferentes xéneros e idades e que van desde adaptacións de xogos xa coñecidos, ata xogos de mesa, xoguetes educativos...
Fonte: Culturagalega.org
O proxecto «O nuestro charrar / El nostre parlar» chegará aos centros educativos aragoneses para divulgar a diversidade lingüística de Aragón dun xeito divertido coa recuperación de frases feitas e expresións en aragonés e catalán.
Fonte: Aragón Noticias
A cadea de supermercados Kaufland introduciu paneis bilingües polaco-silesio nos seus supermercados do sur de Polonia co obxectivo de promover a presenza da lingua vernácula nas superficies comerciais.
Fonte: Notes from Poland
A agrupación Cymdeithas yr Iaith convocou unha marcha a favor da lingua galesa na cidade de Carmarthen para demandar ao Goberno de Gales accións inmediatas perante o importante descenso do número de falantes de galés.
Fonte: Western Telegraph
O estado de Míchigan (EUA) prohibiu ás persoas presas utilizar libros ou dicionarios escritos en linguas diferentes ao inglés. A medida foi xustificada por razóns de seguranza.
Fonte: Language Magazine
Despois do cambio lexislativo que reduce a presenza do ruso nas escolas estonianas, moitos centros educativos do país báltico teñen dificultades para atopar profesorado en linguas estranxeiras diferentes a esta lingua. A razón é a escaseza xeral de profesores e profesoras.
Fonte: Baltic News Network
A Fundación Antonio Pereira convocou Premio Internacional de Poesía Centenario Antonio Pereira, para poemarios escritos en lingua galega ou en lingua española, cando se conmemoran os 100 anos do nacemento deste autor berciano.
Fonte: El Bierzo Digital
Subscríbase ao boletín
