O regulador alemán dos medios de comunicación anunciou a prohibición en Alemaña das emisións da canle rusa Russia Today (RT) en lingua alemá. Moscova criticou a medida e anunciou represalias.
Fonte: Politico
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
04 de febreiro de 2022
O Consello Lingüístico de Noruega aprobou a introdución na lingua norueguesa do pronome neutro "hen" que se empregará como alternativa aos pronomes "hun" (feminino) e "han" (masculino).
Fonte: Notícias ao Minuto
03 de febreiro de 2022
O Goberno vasco e a Federación Guipuscoana de Fútbol presentaron un acordo de colaboración grazas ao cal os cursos UEFA de adestrador de fútbol se ofertarán por primeira vez nunha lingua minoritaria, o éuscaro.
Fonte: Noticias de Gipuzkoa
03 de febreiro de 2022
O Real Club Celta estreou un novo perfil de Twitter integramente en galego, ante as críticas xurdidas nos últimos tempos polo escaso e, mesmo ás veces, incorrecto uso desta lingua na conta que ten nesta rede social desde 2011.
Fonte: La Voz de Galicia
03 de febreiro de 2022
Segundo o informe Usos lingüísticos docentes no curso 2021-2022, o 33,75 % das horas docentes nos mestrados impártese en galego. No caso dos graos, as horas docentes nesta lingua alcanzan o 23,40 %.
03 de febreiro de 2022
A Área de Normalización Lingüística acaba de publicar tres novas guías, que se suman ás catro editadas hai un ano, co obxectivo de achegar ao alumnado de ensino secundario os resultados das investigacións sobre os problemas de repartimentos, histoloxía e monolingüismo. Estas guías remitiranse aos equipos de dinamización lingüística dos centros de secundaria de Pontevedra e Ourense.
03 de febreiro de 2022
Unha xuíza ordenoulle ao Concello de Laudio readmitir a unha traballadora que non conseguiu o nivel de éuscaro esixido para o seu posto co argumento de que esta lingua está considerada como a quinta máis difícil do mundo.
Fonte: Deia
02 de febreiro de 2022
Un acordo entre o Instituto Camões e a Universidade de Costa Rica permitirá crear un lectorado de lingua portuguesa neste país americano. Trátase do primeiro lectorado de portugués en América Central.
Fonte: Observador
02 de febreiro de 2022
A Universidade de Hawai e outros departamentos de lingua hawaiana deste estado dos EUA crearon o proxecto 'Ōlelo of the Week' que permitirá aprender e difundir unha palabra hawaiana cada semana co obxectivo de animar máis persoas a aprenderen a lingua vernácula do arquipélago.
Fonte: University of Hawai'i News
02 de febreiro de 2022
A cuarta edición de «21 días co galego e +» bota a andar coa finalidade de promover o uso do galego oral entre a xente nova. Este programa, impulsado pola Consellería de Cultura, Educación e Universidade, conta coa participación de 3845 persoas entre alumnado, docentes e persoal de administración e servizos. Unha cifra que aumenta respecto ao curso anterior.
Boletín
Subscríbase ao boletín
