Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O tema Terra das Tanxugueiras serviulle ao profesor Cándido Paniagua para elaborar a unidade didáctica “Veñen para quedar”, adaptable aos diferentes niveis educativos para traballar contidos de música e sociolingüística nas aulas.
Fonte: Consello da Cultura Galega
Un proxecto elaborado na biblioteca da Universidade de Gotinga, Alemaña, pretende recompilar o máximo número de obras publicadas en linguas do Ártico e Siberia. O obxectivo é asegurar que as obras non se perdan.
Fonte: Eye on the Arctic
No inicio do curso 2021/2022, só un 33 % do alumnado de ensino básico de Luxemburgo ten o luxemburgués como lingua materna, fronte a unha porcentaxe do 60 % de hai dúas décadas. Porén, o luxemburgués é a lingua de comunicación maioritaria: o 80 % das crianzas domina este idioma.
Fonte: Contacto
A Corporación Nacional de Desenvolvemento Indíxena de Chile (CONADI, polas súas siglas en español) presentou Wallontu Mapu Ñi Mognen, unha serie documental narrada en lingua mapuche ou mapuzugun.
Fonte: Lanco
Baixo o lema “Elhuyar, 50 años más adelante”, esta fundación celebra medio século con distintos actos dedicados, principalmente, ao uso do éuscaro, o fomento da ciencia entre a mocidade e a intelixencia artificial.
Fonte: Noticias de Álava
O Concello de Pamplona presentou a súa oferta educativa nas doce escolas infantís municipais para o curso 2022-2023. No que respecta á oferta de éuscaro, a capital navarra contará con 259 prazas (con ou sen inglés), un 24 % do total, fronte ás 810 en castelán e inglés, que supoñen o 74 %.
Fonte: Naiz
Santiago de Compostela acollerá a celebración do Día dos Medios en Galego, para a que a Amega organiza un roteiro no que se irán realizando paradas en lugares simbólicos na loita pola lingua galega.
Fonte: Galicia Confidencial
O secretario xeral de Política Lingüística, Valentín García, participou no acto de presentación da serie de documentais Os nomes da nosa terra, un proxecto da Asociación Sociopedagóxica Galega (AS-PG) apoiado pola Xunta de Galicia ao abeiro do Fondo de Proxectos Culturais Xacobeo.
O Goberno do Reino Unido apoiou a proposta dun parlamentario laborista que pretende dotar a lingua de signos británica de recoñecemento oficial. Grazas á medida, as persoas xordas poderían ter acceso igualitario á educación e servizos públicos.
Fonte: The Guardian
Un estudo realizado por varias universidades de diferentes países revelou que nunha mostra de 332 linguas do mundo, as palabras que describen texturas rugosas ou ásperas adoitan conter o son vibrante /r/. Trátase dunha semellanza fónica que está presente en linguas tan dispares como o éuscaro ou o mongol e que se remonta a máis de 6000 anos atrás.
Fonte: EurekAlert
Subscríbase ao boletín
