Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O catedrático de dereito constitucional, Miguel Ángel Presno Linera, propón, con motivo da reforma do Estatuto de Autonomía de Asturias, que o galego-asturiano sexa recoñecido como lingua propia do territorio comprendido entre os ríos Eo e Navia e como lingua oficial de toda a comunidade autónoma.
Fonte: Xornal da Mariña
O Consello da Cultura Galega e a Universidade de Santiago presentaron Proxector, un repositorio que escolma recursos da rede sobre as diferentes disciplinas científicas, co principal nexo común que están en galego ou dispoñen de versións subtituladas na nosa lingua.
Fonte: Consello da Cultura Galega
O secretario xeral de Política Lingüística, Valentín García, participou na xuntanza que a Fundación Rosalía de Castro convocou para mudar a data de celebración do día da poetisa galega ao 23 de febreiro. Este cambio prodúcese despois de que a investigadora galega Sagrario Abelleira revelase o pasado ano nova documentación que acredita a data de nacemento real nese día.
Fonte: O Portal da Lingua Galega
A Federación de Ensino de CCOO aproveitou a súa xuntanza coa nova cúpula do partido Podemos en Asturias para demandar a necesidade de crear a especialidade docente de lingua asturiana.
Fonte: Europa Press
O Goberno do Reino Unido destinará 7,5 millóns de euros adicionais á S4C, canle de televisión que desempeña un papel moi importante na preservación da lingua galesa.
Fonte: Wales Online
O Goberno da República de Irlanda e o ministro de Deportes e Gaeltacht (ou zonas de fala irlandesa), Jack Chambers, aprobaron destinar 325 mil euros á organización Conradh na Gaeilge para que implemente o proxecto BÁC le Gaeilge que pretende incentivar o uso do gaélico irlandés na cidade de Dublín.
Fonte: Government of Ireland
O Instituto Camões anuncia a creación dunha licenciatura de Lingua e Cultura Portuguesas na Facultade de Letras e Filosofía da Universidade de Liubliana, Eslovenia.
Fonte: SIC Notícias
Un xornalista angolano publica unha nova gramática de lingua kimbundu que axudará a suplir a falta de manuais escritos nas linguas nacionais de Angola.
Fonte: DW
Artistas, empresas e compañías poden inscribir os seus espectáculos na nova edición da Rede Cultural da Deputación da Coruña, á que a institución provincial destinará 1 900 000 euros. O catálogo desta iniciativa está formado por catro programas, un dos cales, o denominado "Lingua a Escena!" se dirixe a espectáculos con contidos orientados á dinamización social do galego.
O Concello de Orio elaborou unha nova ordenanza de terrazas que regula a ocupación da vía pública. A novidade é que, por primeira vez, estable unha serie de obrigas para a hostalería relativas ao uso do éuscaro, de maneira que todos os elementos que estean á vista do público deberán estar redactados nesta lingua.
Fonte: Noticias de Gipuzkoa
Subscríbase ao boletín
