Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Ministerio de Inmigración e Integración de Dinamarca revelou que o número de persoas estranxeiras que decide aprender dinamarqués en centros públicos de ensino aumentou considerablemente despois de que o Goberno eliminase as taxas asociadas.
Fonte: The Local
A Universidade de Rennes II, na Bretaña francesa, crea a cátedra Mário Soares co fin de ampliar a oferta de estudos de lingua e cultura de expresión portuguesa.
Fonte: CNN Portugal
O Concello de Andoain, en colaboración con varios centros de ensino, lanzou a campaña «Ogia ez dadila falta... ezta euskara ere!» coa que pretende animar as familias do municipio a asumir un papel protagonista na transmisión do éuscaro.
Fonte: El Diario Vasco
O lehendakari, Iñigo Urkullu, fixo entrega do certificado de calidade en xestión lingüística Bikain, que recoñece o labor a prol da normalización do uso do éuscaro das 27 entidades públicas e privadas distinguidas este ano.
Fonte: Deia
Xa está aberta a fase de votación telemática para escoller a Palabra do Ano 2021, que ten como finalistas estas cinco voces galegas: coada, gromo, resiliencia, tanxugueiras e vacinódromo.
Fonte: Real Academia Galega
A Xunta lanza a campaña «Saca o galego que levas dentro», unha acción que busca poñer en valor a lingua propia entre toda a sociedade; destacar a súa importancia como elemento clave da nosa identidade; alimentar o arraigo, o orgullo e o sentimento de pertenza e fomentar o seu uso entre todos os galegos e galegas.
Ghiti é o primeiro sitio en liña completamente bilingüe friulano-italiano que se crea pensando na aprendizaxe das crianzas. A ferramenta conta con materiais de diferente tipo destinados a un público infantil que xa coñece ou non a lingua friulana.
Fonte: Wired
Aiyanna Brown e a súa avoa, Esther Stutzman, pertencen ao pobo kalapuya do estado de Oregón (EUA). Entre as dúas crearon un dicionario para salvagardar a súa lingua nativa.
Fonte: KCBY
A plataforma HE Gurasoak e un grupo de familias instaron o Goberno navarro e o Concello de Pamplona a implantar as novas escolas infantís de Mendebaldea e Lezkairu co modelo de inmersión en éuscaro.
Fonte: Navarra.com
Un total de 18 institucións e entidades catalás e andorranas asinaron un convenio para impulsar o uso do catalán na xustiza mediante a creación de Compendium.cat, un portal de recursos de linguaxe xurídica nesta lingua aberto a todos os profesionais que traballan neste ámbito e á cidadanía en xeral.
Subscríbase ao boletín
