Pontevedra acolle a gala de entrega dos premios da novena edición de Enreguéifate, un certame impulsado por varios concellos para divulgar a regueifa e estimular o uso do galego entre a mocidade. O acto reunirá no Pazo da Cultura arredor de 800 persoas, entre elas alumnado participante de centros de toda Galicia, e combinará a recollida dos galardóns con propostas musicais e intervencións vencelladas á improvisación oral.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
15 de abril de 2026
A nova entrega de Proxector, iniciativa divulgativa en galego, céntrase nas artes plásticas cunha selección de doce vídeos que exploran distintas disciplinas e a súa relación coa ciencia. O percorrido inclúe contidos sobre figuras como José Suárez ou Maruja Mallo, así como achegas á fotografía histórica, á arte urbana e ao patrimonio artístico galego. Ademais, a proposta destaca o potencial da creación artística como ferramenta para divulgar coñecemento científico. Con esta escolma, o proxecto reforza o papel do galego na transmisión cultural e científica.
15 de abril de 2026
O presidente da Xunta, Alfonso Rueda, acompañado do conselleiro de Cultura, Lingua e Xuventude, José López Campos, salientou o bo momento que está a vivir o sector do libro en lingua galega grazas a escritores, editores, bibliotecas e empresas.
Fonte: O Portal da Lingua Galega
14 de abril de 2026
O Goberno vasco e a Oficina Pública da Lingua Vasca crearán en 2026 un fondo de 2,47 millóns de euros para promover o éuscaro en Iparralde, 540 000 euros máis ca o ano anterior. A iniciativa financiará proxectos e reforzará a cooperación transfronteiriza na promoción da lingua.
Fonte: Euskadi.eus
14 de abril de 2026
Está aberta unha convocatoria para profesorado de portugués interesado en impartir docencia en Edimburgo e Glasgow, nos niveis de ensino básico. A candidatura docente forma parte das iniciativas de difusión da lingua portuguesa no exterior do Instituto Camões.
14 de abril de 2026
O Concello de Tremp puxo en marcha unha campaña para reforzar o uso do catalán no comercio local tras detectar carencias na súa presenza, especialmente en negocios con trato directo coa clientela. A iniciativa ofrece formación práctica ao persoal de bares, restaurantes e tendas para mellorar a comunicación oral e escrita, así como apoio na revisión de cartas, carteis e contidos para redes sociais.
14 de abril de 2026
A Praza de San Marcos acollerá o 15 de abril a inauguración de A lingua do futuro / O futuro da lingua, unha exposición fotográfica de Alba Díaz que propón unha reflexión visual sobre a situación sociolingüística de Galicia coincidindo co Día Mundial da Arte. A mostra retrata unha xeración nova que, malia medrar nun contexto de retroceso do galego, conserva a lingua como vehículo principal.
14 de abril de 2026
A presidenta do Instituto de Estudo Cataláns proporá que a Sección Filolóxica estude unha denominación común para a lingua en todos os territorios do seu dominio, coa intención de reforzar unha identificación compartida en contextos externos e académicos. A responsable da institución defende que a fórmula «lingua catalá» podería cumprir esa función sen invalidar as denominacións propias de cada territorio no uso interno.
13 de abril de 2026
O Instituto Camões organiza, en colaboración con seis institucións de ensino superior, a sétima edición do curso de verán de lingua e cultura portuguesas, que se desenvolverá en formato dixital entre xuño e xullo de 2026. As inscricións estarán abertas do 5 ao 18 de maio, e o curso comezará o 29 de xuño, cunha duración de catro semanas. Está dirixido a alumnado de todos os niveis (de A1 a C2) e combina formación lingüística e cultural.
Fonte: Bom dia
13 de abril de 2026
As solicitudes para varios niveis do exame oficial de lingua xaponesa, necesario para estudar ou traballar no Xapón, pecharon antes do previsto polo forte aumento da demanda. A organización adiantou o peche das inscricións por falta de espazos, deixando fóra moitas persoas aspirantes.
Fonte: Japan Wire
Boletín
Subscríbase ao boletín
