Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Un estudo publicado en Nature Human Behaviour revela que máis de 1.700 linguas presentan normas gramaticais comúns, especialmente na orde das palabras e nas estruturas das oracións. Os investigadores conclúen que as linguas non evolucionan ao chou, senón seguindo patróns previsibles condicionados por factores cognitivos e comunicativos compartidos.
Fonte: Diari de la Llengua
Investigadores dos Emiratos Árabes Unidos crearon unha aplicación baseada en intelixencia artificial que permite traducir en tempo real entre lingua de signos e texto ou fala. A ferramenta facilita a comunicación entre persoas con discapacidade auditiva de distintos países e busca mellorar a inclusión en ámbitos como a educación e o traballo.
Fonte: TV Brics
O Goberno de Andorra puxo en marcha unha campaña para fomentar o uso do catalán en bares, cafetarías e tendas de alimentación mediante materiais con vocabulario específico. A iniciativa pretende reforzar a presenza da lingua propia no ámbito comercial e promover o seu valor cultural e identitario.
Fonte: Diari de la Llengua
O Consello Xeral do Poder Xudicial e a Generalitat de Cataluña formalizaron dous convenios para reforzar a formación da carreira xudicial, entre a que se inclúe por vez primeira a aprendizaxe e o perfeccionamento do catalán nos plans de formación continua. A oferta contemplará dous cursos, de nivel inicial e intermedio, abertos a xuízas, xuíces e alumnado da Escola Xudicial con independencia do seu destino.
Estudantes das ikastolas de Iparralde trasladaron á Asemblea Nacional francesa a súa demanda de poder realizar o exame do baxoa (bacharelato) en éuscaro, denunciando a obrigatoriedade de facelo en francés como unha inxustiza. A iniciativa, compartida con alumnado bretón, busca avanzar no recoñecemento das linguas propias no sistema educativo.
Fonte: Arain
Alfonso Blanco Quintela presenta o 11 de abril na Casa da Cultura do Viso o libro Toponimia de Carnota, unha obra editada pola Real Academia Galega na que analiza a orixe e o significado dos nomes de lugar do municipio. O volume afonda na toponimia maior de Carnota e incorpora tamén unha selección de nomes da microtoponimia local.
Fonte: Real Academia Galega
Santiago acollerá o 30 de abril a primeira edición do Cruceiro Fest, un novo evento centrado na música urbana en galego que reunirá en Salgueiriños dez propostas artísticas e nove horas de concertos. Impulsado pola Comisión de Festas do Cruceiro da Coruña 2026, o festival preséntase como unha nova plataforma para visibilizar a creación musical en galego. Xunto co Galegote de Pontevedra, será ademais un dos poucos festivais de Galicia concibidos expresamente arredor da música nesta lingua.
O Departamento de Política Lingüística abriu o prazo para solicitar axudas destinadas a impulsar o uso do catalán no ámbito tecnolóxico e dixital, dirixidas a empresas e entidades sen ánimo de lucro con proxectos neste eido. As subvencións, que poderán cubrir até o 70 % do custo cun máximo de 60 000 euros, distinguirán entre iniciativas para integrar a lingua en produtos tecnolóxicos e as orientadas ao desenvolvemento de ferramentas dixitais e tecnoloxías lingüísticas.
A incorporación de corenta pezas audiovisuais en aragonés á plataforma MyCulture+ supón un novo avance para a visibilidade e o recoñecemento social desta lingua minorizada, cuxa continuidade depende en boa medida do compromiso da propia comunidade falante. A iniciativa permitirá dotar o aragonés dun espazo propio nun servizo internacional especializado en contidos en linguas non hexemónicas.
A Consellería de Cultura, Lingua e Xuventude convocou as subvencións de 2026 para que concellos e agrupacións de concellos de máis de 3000 habitantes impulsen a promoción do galego no ámbito local. As axudas destínanse tanto á creación, consolidación ou reforzo dos servizos de normalización lingüística como ao desenvolvemento de programas de dinamización da lingua. Con esta convocatoria, a Xunta procura apoiar as administracións locais no fortalecemento das políticas de impulso do galego e na extensión do seu uso social.
Subscríbase ao boletín
