Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A iniciativa do Gabinete de Normalización Lingüística do Concello de Valencia, que creou o maior repertorio de listas de música en valenciano publicado ata o momento, xorde para fomentar o uso e a normalización do valenciano. Este proxecto elabórase por xéneros de música, por momentos e por temática.
Fonte: El Periòdic
O número de queixas por vulneración de dereitos lingüísticos que recibiu a Valedora do Pobo duplicouse en 2020, ao pasar de 48 a 96, das que admitiu 76, mentres que rexeitou once e remitiu nove ao Defensor del Pueblo.
Fonte: Nós Diario
A Deputación da Coruña, co obxectivo de impulsar a distribución de cine en galego, proxectará oito filmes, entre os que figuran A virxe roxa de Marcos Nine, Nación de Margarita Ledo ou Negro púrpura de Sabela Iglesias e Adriana P. Villanueva.
Fonte: Deputación da Coruña
Retranca Editora acaba de publicar a versión en galego de Subnormal, unha novela gráfica que conta a historia real do acoso sufrido polo xogador de baloncesto Iñaki Zubizarreta.
Fonte: CulturaGalega
A Dirección Insular de Política Lingüística impartirá 17 seminarios para preparar a parte oral e a escrita das probas oficiais de nivel de catalán. As clases terán lugar polas tardes en Inca e Palma.
Fonte: Diario de Mallorca
Os premios Ciutat de Palma Llorenç Villalonga de Novela e Joan Alcover de Poesía, dotados con 26 000 euros e 12 000 euros respectivamente, outorgaranse a obras escritas en catalán. Así mesmo, o premio Miquel dels Sants Oliver de Periodismo vai dirixido á investigación en catalán e o Ciutat de Palma de Cómic, a obras en catalán ou castelán.
Fonte: Última Hora
O Concello de Rianxo acollerá a primeira ruta interactiva do programa Apego, que ten como obxectivo impulsar a transmisión do galego como lingua inicial. A ruta conta con contidos educativos que se poderán consultar a través dun dispositivo móbil, así como un espazo de promoción do turismo e do lecer familiar na vila.
A Fronte Grande de Salta denuncia que toda a información está en castelán, unha lingua que non fala moita da poboación indíxena da provincia. Por este motivo, demándanlle ao Tribunal Electoral a adaptación do sistema aos idiomas que se falan nos distintos departamentos, como o wichí lhämtés, chorote, chulupi, guaraní ou quechua.
Fonte: Página 12
O Consello Constitucional de Francia, apoiándose no artigo da constitución que declara o francés como a lingua da República, impide o ensino das linguas rexionais ou o emprego de grafías autóctonas nas escolas públicas das rexións onde se fala bretón, catalán ou éuscaro.
A quinta edición da Feira das Linguas Indíxenas Nacionais (FLIN) ten como tema principal a planificación lingüística comunitaria. Celebrarase nun formato mixto (presencial e virtual) cun programa que mestura actividades académicas, presentacións artística e culturais etc.
Fonte: Unesco
Subscríbase ao boletín
