Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A República Dominicana e España asinaron un memorando para promover o uso do español na diplomacia e en organizacións internacionais, aumentando a súa presenza no ámbito xurídico, na arbitraxe e nos procesos de selección en organismos multilaterais.
Fonte: Swissinfo
No curso 2025-2026, o número de alumnos matriculados en catalán en educación infantil e primaria nas escolas públicas da Cataluña Norte baixou dunhas 9.500 a 8.000, o que supón unha caída do 16 %. A diminución débese á redución das achegas económicas por parte das administracións locais, que provocou tamén a supresión de clases de iniciación en máis dunha ducia de centros.
Fonte: Diari de la Llengua
A Xunta de Goberno Local aprobou ampliar en 30 000 euros a convocatoria de subvencións para proxectos de promoción do éuscaro, que ascende así a 199 000 euros, 103 000 máis ca no ano anterior. O principal incremento destínase ás AMPA pero a convocatoria abrangue tamén proxectos en deporte e lecer, medios de comunicación e accións culturais ligadas ao Día Internacional do Éuscaro.
A Deputación de Pontevedra destina 112 200 euros a 44 entidades sen ánimo de lucro da provincia para apoiar actividades de dinamización do galego. As axudas, entre 450 e 4000 euros, permitirán impulsar proxectos de toponimia, contidos audiovisuais, comercio, certames literarios, recitais ou iniciativas ligadas ás Letras.
A Xunta de Galicia e Edicións Positivas convocan a VI edición do Premio Morales cuxo obxectivo é promover o galego no Bierzo e na Seabra e que está dirixido ao alumnado incluído no programa de fomento da lingua nestas zonas. O certame presenta dúas categorías: unha para infantil e primaria e outra secundaria e bacharelato, ambas baseadas nun poema de Antonio Fernández Morales.
O secretario xeral de Lingua, Valentín García, destacou “o papel da lingua como ponte entre culturas e a necesidade de preservar e fomentar a rica diversidade cultural e lingüística de Europa”. Fíxoo no acto institucional pola celebración do Día Europeo das Linguas, que incluíu un recitado multilingüe de poemas a cargo de alumnado de Secundaria e de Bacharelato.
O goberno de Estonia impulsa unha reforma da Lei da lingua estatal para adaptala á realidade social e laboral actual. A proposta inclúe restricións á dobraxe de filmes, novas taxas e sancións ligadas ao coñecemento do idioma e a obriga de usar o estoniano en actos oficiais. O obxectivo final é garantir que se poida vivir en estoniano en todos os ámbitos da sociedade.
Fonte: Baltic News Network
Presentouse oficialmente a Rede Brasileira dos Institutos Confucio, que reúne 11 centros en colaboración con universidades e autoridades da China e o Brasil. A iniciativa ten como obxectivo difundir a lingua e a cultura chinesas, impulsar a cooperación académica e fortalecer o diálogo intercultural.
Fonte: Brasília in Foco
Un novo proxecto cinematográfico internacional, froito dunha coprodución entre Luxemburgo e Portugal, está a buscar talentos locais que falen portugués.
Fonte: Bom dia
O Fórum para a Cooperación Económica e Comercial entre a China e os Países de Lingua Portuguesa organiza en Macau a 17.ª Semana Cultural da China e os Países de Lingua Portuguesa. O evento reunirá varios grupos culturais de nove países lusófonos co obxectivo de fortalecer os datos culturais e promover o diálogo entre as civilizacións.
Fonte: e-Global
Subscríbase ao boletín
