O Termcat incorporou 246 novos termos ao Diccionari general de l’esport, que roza xa as 12 000 entradas, nunha nova aposta da Generalitat por reforzar a normalización do catalán no ámbito deportivo. A actualización acompáñase doutros recursos dixitais, como unha infografía sobre material de ximnasio e un xogo interactivo de vocabulario do baloncesto, ademais de obradoiros de sensibilización lingüística para profesionais do deporte.

Burkina Faso integrou as súas linguas nacionais na súa estratexia de desenvolvemento da intelixencia artificial co obxectivo de crear tecnoloxías máis inclusivas e adaptadas ao contexto local. O plan inclúe a creación de recursos lingüísticos para varias linguas do país e o desenvolvemento de aplicacións como recoñecemento de voz ou tradución automática.

Fonte: Tech Africa News

Euskarabidea e os euskaltegis da comarca de Pamplona impulsan unha nova edición do Iruñerriko Mintzodromoa, unha iniciativa pensada para fomentar o uso do éuscaro e tecer novas relacións entre quen o aprende. O encontro, que se celebrará o 22 de abril, reunirá arredor de 160 persoas en dinámicas de conversa guiada sobre temas cotiáns e distendidos. A proposta, aberta a quen teña cando menos un nivel B1, enmárcase na aposta institucional por favorecer o paso da aprendizaxe ao uso real da lingua.

Diversos centros e institucións da USC convocan a terceira edición do Concurso de edición da Galipedia, unha iniciativa dirixida á comunidade universitaria co propósito de reforzar a creación e a difusión de contidos de calidade en galego. O certame premiará a elaboración de artigos novos ou a mellora substancial doutros xa existentes en ámbitos como psicoloxía, matemáticas, enxeñaría, enfermaría, patrimonio cultural, dereito ou física de partículas. En cada unha das áreas temáticas concederanse dous galardóns, dotados con 350 e 150 euros.