Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O goberno do Quebec anunciou un novo requisito para traballadores estranxeiros temporais. Aquelas persoas traballadoras que acumulen tres anos de emprego na provincia deberán demostrar competencia oral en francés de nivel 4 para obter ou renovar o certificado de permiso de traballo.
Fonte: ImmigCanada
O goberno nacionalista de Narendra Modi na India está favorecendo o uso do hindi en actos oficiais, documentos e concursos, co argumento de superar o pasado colonial e diminuír a preponderancia do inglés. Isto xerou descontento e controversia nalgúns estados onde o hindi non é a lingua principal, especialmente no sur do país.
Fonte: DW
A plataforma Picardemans.cat xurdiu para impulsar o uso espontáneo do catalán nos patios escolares mediante xogos tradicionais de palmas e cancións populares adaptadas á lingua propia. A iniciativa responde á perda de presenza do catalán entre a infancia e ofrece recursos audiovisuais con versións catalás, incluídas variedades dialectais, de temas que se cantaban habitualmente noutras linguas.
A exposición de arte dixital «Castelao. Mirar por Galicia» despídese da Cidade da Cultura o vindeiro domingo 11 de xaneiro superando xa as 34 000 visitas. Organizada pola Xunta de Galicia en colaboración coa Fundación Castelao, a mostra representa a experiencia tecnolóxico-cultural máis avanzada ata o momento ao redor desta figura.
Iniciativa pol Asturianu puxo en marcha unha nova edición da votación popular para escoller a mellor noticia a prol do asturiano do último ano, unha campaña activa desde 2013 para visibilizar avances a favor da lingua. A entidade destaca que a iniciativa permite facer balance do traballo realizado por diferentes colectivos e institucións e reforzar o compromiso social coa normalización lingüística.
Un estudo revela que arredor do 60 % da poboación catalá apenas ten en conta o catalán na configuración dos seus dispositivos dixitais, malia existir opcións técnicas para empregar esta lingua. A investigación amosa que a mocidade é o grupo menos sensibilizado, mentres que as persoas maiores e con estudos universitarios presentan unha maior conciencia lingüística.
O Principado puxo en marcha Alfaya, unha marca lingüística creada para recoñecer as empresas que incorporan o asturiano e o eonaviego na súa comunicación e no seu funcionamento cotián. A iniciativa pretende reforzar a presenza destas linguas no ámbito económico e dignificar o seu uso asociándoo á innovación e á identidade cultural. A través deste selo, promóvese unha rede empresarial comprometida coa normalización lingüística e co valor engadido que achega a lingua propia á actividade profesional.
A Deputación de Pontevedra pechou cunha alta participación a primeira edición do Premio Castelao de Textos Teatrais, que reuniu 43 obras presentadas e que se resolverá o 29 de xaneiro de 2026, coincidindo co aniversario do nacemento de Castelao. O certame, dotado con 12 000 euros, nace no contexto do 75 aniversario do falecemento do autor e diríxese a recoñecer textos inéditos e non representados, escritos en galego normativo.
Un estudo publicado no último número de Cadernos de Lingua revela que máis do 70 % do profesorado de matemáticas optaría por impartir a materia en galego de ter liberdade para facelo. A investigación, elaborada por persoal investigador da USC, analiza a práctica lingüística segundo o xénero e confirma que non existen diferenzas relevantes entre docentes homes e mulleres neste aspecto, aínda que si unha maior tendencia feminina á acomodación comunicativa.
A Universidade de Tartu, en Estonia, recibiu 1,6 millóns de euros do legado da estoniana emigrada Kadri Rõuk para crear o Fondo Familiar Rõuk da Lingua Estoniana, destinado a impulsar a investigación e o ensino da lingua e da lingüística estonianas. Trátase da maior doazón privada realizada até o de agora para apoiar as actividades da universidade e a preservación da lingua estoniana.
Fonte: University of Tartu
Subscríbase ao boletín
