Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Os cursos de Lingua e Cultura Portuguesas, organizados polo Instituto Camões a través da súa rede educativa en Alemaña, celebraron o Nadal en Hannover, Braunschweig e Wolfsburg con música, teatro e poesía, reunindo alumnado e familias nun ambiente festivo que puxo en valor a lingua e a cultura portuguesa.
Fonte: Bom dia
O novo sitio web adobraxe.com é un proxecto participativo, aberto ás achegas da cidadanía, que recompila información relacionada coa dobraxe en lingua galega. Nesta base de datos atoparás as producións dobradas ao galego e información sobre empresas e profesionais que participaron nestas producións.
Fonte: Consello da Cultura Galega
O Concello de Carballo convocou dous premios no marco do XIII Festival Carballo Interplay 2026, co fin de recoñecer, visibilizar e impulsar a creación e a produción de contidos dixitais en lingua galega na rede. As iniciativas insírense na celebración do festival, prevista do 16 ao 19 de abril de 2026, e diríxense a creadoras e creadores que difundan o galego en internet.
Fonte: Consello da Cultura Galega
O portal Totjoc ampliou polo Nadal o seu buscador de xogos e xoguetes en catalán, até reunir 1530 produtos e preto de 600 establecementos onde adquirilos, co obxectivo de normalizar o lecer nesta lingua. A iniciativa reforzouse con recomendacións audiovisuais e titoriais difundidos a través de YouTube, coa colaboración do comercio especializado.
A RAE publicou a versión 1.4 do CORPES, que supera os 445 millóns de formas e os 412.000 documentos, con materiais escritos e orais representativos do español actual. A actualización incorpora máis de sete millóns de rexistros novos, revisa os criterios de codificación e afonda na depuración de coincidencias textuais. A ferramenta consolídase como recurso clave para investigar e analizar os usos contemporáneos da lingua.
Nalgunhas zonas do País de Gales, a escaseza de persoal docente con competencia en galés está a obrigar as escolas de inmersión en lingua galesa a contrataren profesorado monolingüe en inglés. Porén, a maioría do profesorado mostra un firme compromiso por aprender ou mellorar os seus coñecementos de galés.
Fonte: BBC
A rexión de Friúl Venecia Xulia aprobou unha emenda orzamentaria para potenciar as emisións de radio e televisión en lingua friulana. A medida prevé un investimento anual durante tres anos, xestionado pola ARLeF (Axencia Rexional da Lingua Friulana), coa finalidade de aumentar a presenza do friulano tanto nos medios públicos como nos privados.
Fonte: Rai News
Euskaltzaindia e UZEI escolleron muga-zerga como palabra do ano, ao consolidarse como equivalente en éuscaro de arancel e sinónimo de aduana-zerga. A elección responde á forte presenza do concepto na actualidade informativa, marcada polas medidas comerciais impulsadas polo Goberno dos Estados Unidos e polo seu impacto económico global.
A Fundación Instituto Castelán e Leonés da Lingua e a Fundación PROCONSI asinaron un acordo para impulsar o Centro Virtual das Orixes do Español, unha plataforma destinada a dixitalizar, conservar e divulgar o patrimonio documental vinculado ao nacemento do castelán. O proxecto combinará investigación, difusión cultural e recursos educativos mediante ferramentas tecnolóxicas avanzadas, co obxectivo de reforzar a proxección internacional desta herdanza lingüística.
A Área de Normalización Lingüística da Universidade de Vigo presentou o seu almanaque de 2026, que chega á novena edición e incorpora como principal novidade as viñetas do ilustrador vigués Pepe Carreiro, en substitución de Luís Davila. O calendario mantén o propósito de pór en valor que a comunidade universitaria use o galego con orgullo en todos os ámbitos, desde o académico até o lecer, e inclúe referencias ás datas das patroas e dos patróns das escolas e facultades.
Subscríbase ao boletín
