Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O chanceler alemán, Friedrich Merz, reiterou a súa oposición a facer oficiais o catalán, o galego e o éuscaro na UE, alegando que a súa incorporación complicaría o sistema de traducións. Apuntou que, a medio prazo, a intelixencia artificial podería permitir unha solución ao eliminar a necesidade de intérpretes.
Fonte: Diari de la Llengua
O Ministerio de Educación de Cabo Verde decidiu suspender a distribución nas escolas do manual escolar de lingua e cultura caboverdiana despois das críticas lanzadas por varios sectores sociais e culturais. A medida, presentada como un xesto de diálogo, pretende evitar tensións e favorecer un debate sobre a mellor forma de ensinar a lingua nacional.
Fonte: RNA
O Concello de Bilbao impulsa o programa Biribilko para que persoal de comercio e hostalería mellore o seu nivel de éuscaro e poida empregalo coa clientela, empresas provedoras... Os cursos, de 90 horas e dous niveis, desenvolveranse de outubro de 2025 a xuño de 2026 en euskaltegis homologados, cun custo de 90 euros que se devolverá ao alumnado con asistencia mínima do 75 %. Ademais, ofrécese servizo gratuíto de tradución de carteis e materiais públicos, así como dicionarios especializados.
A Deputación de Valencia entregou os IV Premios de uso do valenciano no comercio local que distinguen unha trintena de establecementos da provincia pola súa contribución á defensa da lingua propia. Os galardoados agradeceron o apoio institucional, que lles serve de estímulo para integrar o valenciano en toda a súa comunicación.
O conselleiro de Cultura, Lingua e Xuventude, José López Campos, propuxo declarar o 2026 como Ano Ramón Otero Pedrayo co gallo do 50 aniversario do seu pasamento e o centenario da publicación de Guía de Galicia. Fíxoo na presentación das cátedras institucionais dedicadas ao autor ourensán, Rosalía de Castro, Castelao e Carvalho Calero, onde destacou que o legado destes persoeiros son “o piar que define a nosa cultura e identidade como galegos e por iso é importante recoñecelo e enxalzalo”.
O conselleiro de Cultura, Lingua e Xuventude, José López Campos, participou na presentación do derradeiro espistolario de Manuel Curros Enríquez ao seu amigo José Ojea Otero. Trátase dunha colección composta por 32 cartas inéditas que o autor de Celanova lle enviou entre xuño de 1904 e xaneiro de 1908, algunhas delas escritas tres meses antes de falecer na Habana.
Un estudo revela que o castelán despraza o catalán como lingua das publicacións científicas en revistas catalás, con case o 70 % dos artigos en castelán fronte ao 9 % en catalán e o 25 % en inglés. A presión dos índices internacionais e das políticas de acreditación favorece a escrita en inglés e resta prestixio ao catalán, ao que se suma a falta de recursos e apoio institucional.
Elhuyar lanza un novo servizo na súa plataforma Aditu que permite dobrar vídeos en éuscaro, castelán, francés, inglés, galego e catalán, mantendo mesmo o ton e o acento da voz orixinal. A ferramenta, baseada en intelixencia artificial e redes neuronais, facilita tamén transcricións, subtítulos e traducións automáticas, e ofrece un resultado editable e sen erros.
A novena edición de Youtubeiras+, que ten como lema “Alborota o algoritmo”, destina 7500 euros en premios repartidos en sete categorías para impulsar a creación de contidos en galego nas redes sociais. A iniciativa quere darlle visibilidade ao talento en galego e reforzar a presenza deste idioma no ámbito dixital.
O secretario xeral da Lingua, Valentín García, participou na entrega do cuarto premio de literatura infantil Simbad, que recaeu en Rita Doallo, pola obra Astralistoria. Trátase dunha iniciativa impulsada pola Asociación Galega de Axuda aos Enfermos con Demencia Tipo Alzhéimer que conta co apoio da Xunta de Galicia, co obxectivo de sensibilizar sobre esta doenza entre a cativada e establecer vínculos a través da literatura entre as distintas xeracións.
Subscríbase ao boletín
