Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Goberno de Gales e a comisaria da Lingua Galesa, Efa Gruffudd Jones, propoñen unha reforma ampla na educación para impulsar o uso do galés. As cifras mostran que o número de falantes diminúe e hai falta de escolas e docentes en galés, polo que reclaman medidas innovadoras e estruturais para garantir o seu uso en todos os ámbitos e poder atinxir o millón de falantes para o ano 2050.
Fonte: Diari de la Llengua
O Plan educativo de contorno de Lleida impulsa unha campaña de sensibilización lingüística destinada a reforzar o uso social do catalán no ámbito educativo ante o descenso da súa presenza nos centros. Baixo o lema «Parla en català i peta-ho!», a iniciativa inclúe vídeos con referentes da comunidade, creación de contidos por parte do alumnado e materiais de visibilización nos colexios. A proposta procura xerar contextos reais de uso da lingua entre a infancia e a mocidade e consolidar o catalán como ferramenta de cohesión, aprendizaxe e participación social.
O concelleiro de Normalización Lingüística de Pontevedra presentou a 16ª edición do Certame de Microrrelatos en Galego, promovido pola Escola Oficial de Idiomas coa colaboración municipal. A iniciativa, aberta a persoas maiores de 14 anos, busca reivindicar a vitalidade do galego como lingua de creación literaria a través de textos breves elaborados a partir de tres palabras propostas pola organización.
Ambas as entidades asinaron un convenio de colaboración por cinco anos co obxectivo de reforzar as sinerxías no desenvolvemento e promoción do éuscaro. O acordo prevé intensificar o traballo conxunto na difusión das normas do éuscaro unificado, no enriquecemento do vocabulario e na súa normalización en ámbitos científicos e técnicos.
O Consello de Europa publicou dous informes sobre Hungría, centrados nas 13 minorías nacionais recoñecidas e no uso das linguas minoritaria. O organismo valora o marco legal e o apoio financeiro existente, pero advirte de carencias na aplicación práctica dos dereitos lingüísticos. Tamén sinala problemas como a segregación escolar da poboación romaní e a necesidade de reforzar a loita contra os delitos de odio. Entre as recomendacións, pide promover a tolerancia, mellorar a inclusión social e fomentar o uso público das linguas minoritarias.
Un estudo publicado na Universidade York de Toronto explica que a educación bilingüe pode ter efectos positivos no cerebro infantil. Evidencias actuais demostran que a exposición regular a dous idiomas desde a infancia mellora habilidades como a atención, a memoria, a flexibilidade cognitiva e a capacidade de resolver problemas.
Un estudo da Universidade Pompeu Fabra advirte de que ferramentas de intelixencia artificial xerativa están a difundir usos non normativos do catalán, en boa medida pola influencia do castelán nos seus modelos de adestramento. A análise, baseada en seis modelos lingüísticos e nun corpus de 160 oracións, revela que os sistemas multilingües presentan unha maior tendencia a desviárense da norma por interferencia do español ca os especializados en catalán.
O Equipo de Dinamización da Lingua Galega do IES San Clemente convoca o Premio de vídeos publicitarios «Galeguizar é multiplicar», no marco do programa «O galego fainos fortes», co obxectivo de fomentar o uso da lingua no ámbito empresarial a través da creación audiovisual. A iniciativa diríxese a alumnado de secundaria, bacharelato e formación profesional de calquera centro, que deberá elaborar pezas de ata dous minutos sobre empresas compostelás que empreguen o galego e formen parte das redes Galego Empresas ou Abertos ao Galego.
O Concello de Pamplona e Soziolinguistika Klusterra asinaron un convenio para desenvolver a IX Medición do Uso das Linguas na Vía Pública, un estudo científico que ofrecerá datos actualizados sobre o emprego real dos idiomas na cidade. A investigación, con máis de tres décadas de traxectoria, baséase na observación sistemática de conversas espontáneas e incorpora melloras metodolóxicas e ferramentas dixitais que reforzan a representatividade dos resultados.
Un informe elaborado polo medio de comunicación en liña Phayul revela que as autoridades da China están a endurecer as restricións sobre a expresión dixital tibetana na plataforma de redes sociais Kuaishou, censurando publicacións que inclúan escritura ou fala en tibetano, traxes tradicionais e ensinanzas relixiosas. As persoas usuarias enfróntanse a advertencias, suspensións temporais ou eliminación permanente das súas contas se comparten este tipo de contidos.
Subscríbase ao boletín
