A Universidade de Tartu, en Estonia, recibiu 1,6 millóns de euros do legado da estoniana emigrada Kadri Rõuk para crear o Fondo Familiar Rõuk da Lingua Estoniana, destinado a impulsar a investigación e o ensino da lingua e da lingüística estonianas. Trátase da maior doazón privada realizada até o de agora para apoiar as actividades da universidade e a preservación da lingua estoniana.

Fonte: University of Tartu 

A proposta do consello comunitario de Botwnnog, en Gales, para impedir que persoas non falantes de galés accedesen á compra de vivendas foi rexeitada por considerarse contraria á lexislación vixente. A iniciativa xurdiu da preocupación polo retroceso da lingua propia en zonas onde a presión inmobiliaria favorece a chegada de poboación allea con maior poder adquisitivo. Porén, as autoridades concluíron que non se demostrou un impacto significativo sobre o galés e priorizaron a necesidade urxente de vivenda.

A Secretaría de Políticas Lingüísticas e o Centro Nacional de Computación coordinaron actuacións para favorecer a incorporación das linguas indíxenas ao espazo público dixital. O encontro tivo como finalidade facilitar o acceso destas linguas á internet e reforzar a súa presenza en contornos tecnolóxicos. A iniciativa pretende impulsar a diversidade lingüística no Paraguai e avanzar na visibilización e normalización das linguas propias no ámbito dixital.

O Centro Nacional das Artes puxo en marcha o Proxecto Caracol, unha iniciativa que promove a colaboración entre creadoras e creadores de distintas disciplinas para difundir, preservar e fortalecer as linguas indíxenas nacionais. A proposta reúne música, artes plásticas e deseño a partir de poemas, cancións e obras gráficas, co fin de construír pezas artísticas colectivas.

Fonte: Revista Zocalo