Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Parlamento Europeo aprobou por maioría unha resolución para apoiar a iniciativa cidadá europea Minority Safepack que demandaba maior protección para as culturas e linguas minorizadas no seo da Unión Europea. O Parlamento declarou ademais que as minorías lingüísticas están sufrindo procesos de asimilación o que leva á perda das súas linguas e a un empobrecemento cultural.
Fonte: European Parliament
A Real Academia Española (RAE) e Telefónica continúan coa súa colaboración en intelixencia artificial ao abeiro de LEIA, un proxecto que ten como obxectivo principal impulsar un maior e mellor uso do español no mundo dixital, para o cal puxeron marcha dúas iniciativas: creación de retos lingüísticos e fomento da investigación na universidade.
O certame Galetiktokers, convocado polo Concello de Ames para estimular a creatividade entre a mocidade, animar a creación de vídeos en galego con novos formatos e temáticas e darlle visibilidade á comunidade galega de tiktokers, xa ten gañadores.
Fonte: Concello de Ames
A Asociación de Farmacéuticos Euscaldúns (Feuse), da que forman parte farmacias de Navarra e Euskadi, celebra o seu 25 aniversario facendo balance do seu traballo a prol do uso do éuscaro neste tipo de establecementos, período no que destacan un dicionario castelán-éuscaro específico, premios ou unha revista dixital, entre outras actividades.
O Pleno da Real Academia Galega decidiu dedicarlle o Día das Letras Galegas de 2021 a Xela Arias, unha das voces máis destacadas da poesía galega contemporánea, unha poesía singular, transgresora, sincera e comprometida, ademais salientar o seu importante labor como editora e tradutora.
A lingua galega no sector téxtil, da publicista Anabel Antela Castro, é un traballo de fin de grao para o que a autora investigou como transmiten as compañías téxtiles de Galicia as súas orixes e como utilizan o galego.
Fonte: Nós Diario
O secretario xeral de Cultura, Anxo M. Lorenzo, e o delegado territorial da Xunta en Ourense, Gabriel Alén, presentaron na sede da Delegación o libro Arqueoloxía do noroeste peninsular en tempos de Nós impulsado polo Goberno galego en colaboración co Seminario de Estudos Galegos.
O Consello Rexional da Bretaña anunciou que o Centro Nacional de Ensino a Distancia (CNED, polas súas siglas en francés) porá a disposición de todos os institutos de Francia cursos de bretón en liña a partir do próximo curso académico.
Fonte: Ouest France
O ministro de Transportes de Nova Zelandia, Michael Wood, quere aplicar unha política bilingüe inglés-maorí nos sinais de tráfico en todo o país.
Fonte: Otago Daily Times
O primeiro ministro do Canadá, Justin Trudeau, está preocupado pola situación do francés en Quebec e mostrouse disposto a modificar as leis en materia lingüística para dar máis protección legal a esta lingua.
Fonte: CTV News
Subscríbase ao boletín
