Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Universidade de Lisboa amplía o prazo para estudar linguas eslavas de xeito gratuíto. O alumnado que decida matricularse achegarase por medio destes cursos aos idiomas falados en Rusia, Bulgaria, Polonia, Eslovenia, República Checa e Croacia.
Fonte: Público
O proxecto The Rosetta Project pretende preservar os datos dunhas 1500 linguas do mundo por medio do seu almacenamento nun disco de níquel de menos de 8 centímetros de diámetro.
Fonte: Xataka
O Viquimarató de la Llengua Catalana celebrarase entre o 6 e o 13 de novembro e, a causa da pandemia, desenvolverase en liña co cancelo #ViquiLlengua7x7. Ademais, a novidade desta sétima edición é que, por vez primeira, participarán os sete territorios de fala catalá.
Fonte: Generalitat de Catalunya
O debate lingüístico reábrese na Comunidade Valenciana ante a posibilidade de que na nova Lei de función pública o coñecemento do valenciano se converta en obrigatorio para quen queira acceder á Administración, tamén no caso do persoal sanitario.
Fonte: El Periòdic
O Fondo de Proxectos Culturais Xacobeo 2021 da Xunta de Galicia súmase á homenaxe ao Centenario da Xeración Nós, coa colaboración do Museo do Pobo Galego, a través da mostra “Mar de libros”, de Isabel Pintado, que se exhibe en San Domingos de Bonaval ata o vindeiro 6 de decembro.
O secretario xeral de Política Lingüística, Valentín García, visitou a mostra Ricardo Carvalho Calero. A voz presente, que promove a Consellería de Educación, Cultura e Universidade en colaboración coa Associaçom Galega da Lingua (AGAL) no marco da programación institucional conmemorativa das Letras Galegas 2020 da Xunta de Galicia.
Un bo número de mobilizacións espalladas por todo o estado francés demandaron ao executivo galo que garanta o ensino de linguas rexionais como o occitano ou o bretón e promova un estatuto de protección para todas elas.
Fonte: Jornalet
O Goberno do Canadá expresou, por medio de dous dos seus ministros, un firme compromiso na protección e promoción das linguas nativas da provincia de Manitoba.
Fonte: Cision
A nova partida orzamentaria aprobada na República de Irlanda inclúe un investimento de 18 millóns de euros para a promoción da lingua gaélica e as zonas de fala gaélica ou Gaeltacht.
Fonte: Newry
O Goberno de Chipre informou de que as escolas de educación primaria e secundaria do país reforzarán o ensino da lingua grega entre o alumnado procedente de familias estranxeiras.
Fonte: Cyprus Mail
Subscríbase ao boletín
