Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O movemento para conseguir que a gramática da lingua española adopte termos máis inclusivos está gañando unha ampla adhesión na Arxentina, mesmo en boca do seu presidente Alberto Fernández que empregou o termo neutro "arxentines" para dirixirse a toda a cidadanía por mor da crise do coronavirus.
Fonte: The New York Times
Varios colectivos demándanlle á Real Academia Galega que o ano 2021 estea tamén dedicado á memoria de Ricardo Carvalho Calero, dada a excepcional situación de crise sanitaria.
Fonte: Galicia Confidencial
O Goberno balear autorizou un novo mestrado para que imparta a Universidade das Illas Baleares o vindeiro curso 2020-2021 sobre competencia lingüística e literaria, investigación e ensino.
Fonte: 20minutos
O Consorcio para a Normalización Lingüística reorganizou a súa actividade para, baixo o slogan “Connecta’t. Activa el teu català!”, ofrecer en liña unha boa parte dos seus servizos e permitir así que as persoas interesadas continúen aprendendo catalán. Así ocorre cos cursos de catalán da plataforma virtual Parla.Cat, o Voluntariado pola Lingua ou o asesoramento lingüístico telemático.
Fonte: Generalitat de Catalunya
Baía Edicións puxo en marcha a campaña #euquedolendo #baíaconnósnacasa, coa que facilita o libre acceso en formato dixital a unha selección de dez obras de literatura infantil e xuvenil en lingua galega, que xa están dispoñibles para descargar na súa páxina web.
Fonte: Consello da Cultura Galega
Talín, a capital de Estonia, comezará a emitir na canle de televisión PBK un parte de noticias en lingua rusa co fin de que a poboación de orixe rusa poida seguir os acontecementos da crise sanitaria do Covid-19.
Fonte: ERR
Desde a BBC de Londres o 14 de abril de 1947 comezouse a emitir 'Galician Programme’, un espazo que supuxo a primeira programación estable en lingua galega. Emitíase cada tres semanas, cunha duración variable, e estivo en antena ata 1956, cando se retirou por presións do goberno de Franco.
Fonte: Nós Diario
Durante o confinamento, a través do portal web do Museo do Prado será posible percorrer a súa colección en nove linguas. Ademais de España, foron Italia, México, Rusia e Arxentina os países que máis o visitaron de maneira virtual durante o mes de marzo.
Fonte: Siglo XXI
O novo regulamento para as escolas infantís municipais da Coruña, que aínda non está aprobado, inclúe entre os seus obxectivos a difusión da cultura galega e o uso do galego como lingua vehicular, así como o reforzo do ensino do inglés.
Fonte: La Opinión
«Per Sant Jordi, una paraula!» é unha iniciativa participativa coa que o Goberno balear pretende que a cidadanía comparta palabras en catalán a través das redes sociais o 23 de abril, día de San Jordi, co cancelo #parauladesantjordi.
Fonte: Govern Illes Balears
Subscríbase ao boletín
