A quinta edición de «Enredando co Galego», promovida pola Asociación de Escritores en Lingua Galega (AELG), involucra institutos de Lugo para incentivar a reflexión da mocidade sobre o uso do galego nas redes e para crear espazos de expresión literaria na web. A iniciativa, que agarda reunir arredor de seiscentos estudantes, combina participación dixital, creación artística e acción educativa e contribúe a derrubar prexuízos e a fortalecer a presenza do galego entre a xente nova.

A proposta lexislativa presentada por varias formacións nacionalistas no Congreso procura garantir plenamente os dereitos lingüísticos e avanzar cara a un plurilingüismo efectivo no Estado. A iniciativa quere asegurar que a cidadanía poida utilizar calquera lingua oficial perante a xustiza, as administracións estatais e os servizos públicos. O texto abrangue tamén ámbitos como consumo, transporte, medios e ensino e permitirá superar a desigualdade histórica entre linguas e blindar un trato equivalente para quen empregue galego, catalán, éuscaro ou aranés.

O Ministerio de Educación, Ciencia e Deporte de Lituania propón que, a partir de 2026, as persoas estranxeiras que traballen no sector servizos deberán acreditar un nivel básico de lingua lituana, e que tras dous anos de residencia no país se deberá esixir un nivel superior.

Fonte: UNN

O Concello de Pamplona traballa na elaboración do novo Plan de normalización lingüística para reforzar o uso e o prestixio social do éuscaro. O proxecto, que se desenvolverá ata novembro de 2026, comezará cun diagnóstico sociolingüístico que servirá de base para o deseño dun plan dirixido a ampliar a presenza da lingua tanto na cidade como na propia administración. A iniciativa incluirá unha estratexia de comunicación e a creación dun consello municipal do éuscaro, encargado do seguimento e avaliación das medidas.