Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Goberno de Croacia anunciou que as persoas estranxeiras que queiran prorrogar o seu permiso de traballo deberán superar un exame de croata de nivel A1.1 despois dun ano no país. A medida forma parte dunha reforma máis ampla da Lei de Estranxeiría, mentres se reduce o número de permisos concedidos, especialmente no sector da construción.
Fonte: Croatia Week
Alingua presenta unha nova edición do seu Club de Debate, unha proposta colaborativa dos servizos de normalización lingüística que procura estimular a expresión oral en galego, o pensamento crítico e o diálogo respectuoso no alumnado de secundaria, bacharelato e ciclos formativos.
Fonte: Consello da Cultura Galega
O Goberno vasco aprobou dúas novas vías, máis simples e adaptadas á práctica diaria, para acreditar os perfís lingüísticos na administración pública: demostrar o uso efectivo do éuscaro no propio posto e superar o proceso selectivo integramente en éuscaro. Estas opcións súmanse ás xa vixentes e amplían as posibilidades de obtención da acreditación.
Euskaragida 2025 é unha guía que reúne as últimas novidades en produtos infantís en éuscaro (libros, cómics, xogos, música ou contidos dixitais) organizadas por categorías e por tramos de idade para facilitar a elección das familias. A publicación distribuirase entre o alumnado de infantil e primaria de Donostia grazas á colaboración dos centros educativos, ademais de estar dispoñible en librerías, bibliotecas e espazos culturais.
A Real Academia Galega incorporou un cento de termos novos ao seu Dicionario, entre eles voces tradicionais, creacións recentes e palabras que completan familias léxicas, o que facilita resolver dúbidas de escrita e uso. A actualización inclúe tamén vocabulario científico e xentilicios. Con máis de 58 000 entradas, consolídase así como recurso esencial para garantir un uso preciso e actualizado do galego.
O Goberno de Benín presentou a iniciativa “JaimeMaLangue”, unha campaña para recoller voces en linguas maternas a través dunha plataforma dixital para integralas no ecosistema da intelixencia artificial. O obxectivo é que as novas tecnoloxías sexan capaces de entender e reproducir idiomas benineses como o fongbé, e máis adiante o ioruba ou o baatonu.
Fonte: TechAfrica News
Apenas o 1 % do alumnado na Federación Rusa recibe ensino nunha lingua que non é o ruso, unha porcentaxe que se reduciu á metade en nove anos. Esta diminución das linguas minoritarias nas escolas está a pór en risco tanto a supervivencia desas linguas como o patrimonio cultural das súas nacións.
Fonte: Jamestown
O goberno nixeriano decidiu suspender o uso da lingua materna como medio de ensino nas escolas primarias e optou por volver ao inglés como lingua de instrución, unha medida que suscitou unha resposta desigual entre usuarios e profesorado.
Fonte: GameNexus
O suahili gaña novo prestixio internacional tras ser recoñecido pola Unesco como unha das súas linguas oficiais de traballo durante a 43.ª Conferencia Xeral celebrada en Samarcanda, Uzbekistán.
Fonte: UNESCO
O Diario Oficial de Galicia publicou a resolución da Secretaría Xeral de Medios da Xunta de Galicia da convocatoria do ano 2025 de axudas destinadas a empresas que realicen publicacións periódicas escritas integramente en galego.
Fonte: Consello da Cultura Galega
Subscríbase ao boletín
