Vaughan Williams, un concelleiro da cidade galesa de Caergybi (Holyhead en inglés), avoga pola protección legal dos nomes en galés das casas ou vivendas tradicionais co fin de garantir a preservación do patrimonio e a memoria histórica.
Fonte: BBC
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
27 de xaneiro de 2020
A Oficina Pública do Éuscaro, con sede en Baiona, País Vasco francés, publicou un informe sobre o uso dos medios de comunicación local en todo o País Vasco. O estudo constata un aumento dos programas emitidos en éuscaro e mostra que nove de cada dez habitantes consomen medios de comunicación locais.
Fonte: France Bleu
27 de xaneiro de 2020
A ordenanza de normalización lingüística do Concello de Gondomar, aprobada definitivamente no pleno do mes de xaneiro, ten como obxectivos incorporar o galego en todos os ámbitos da vida municipal e impulsar a normalización do seu uso no conxunto da sociedade.
Fonte: Faro de Vigo
27 de xaneiro de 2020
Co gallo da celebración o 24 de xaneiro do Día do Punto Voado (Dia del Punt Volat), ponse en marcha unha campaña para dar a coñecer este signo emblemático do catalán co obxectivo de que a organización internacional Unicode o inclúa na súa páxina de signos patrocinados.
Fonte: Generalitat de Catalunya
27 de xaneiro de 2020
O grupo de investigación para o estudo da variación do éuscaro, Eudia, da Universidade do País Vasco realizou o estudo Euskalkien sailkapen berria no que distinguen tres dialectos desta lingua: o occidental, o central e o oriental.
Fonte: EiTB
27 de xaneiro de 2020
O Pub Gatos acolle o venres 31 de xaneiro o concerto Presume de Galego, organizado polo alumnado do IES de Melide. Esta iniciativa, que chega así á súa cuarta edición, insírese nun proxecto educativo transversal cuxo obxectivo é fomentar a socialización en galego da mocidade a través da música.
Fonte: Consello da Cultura Galega
27 de xaneiro de 2020
A conselleira de Educación, Universidade e Formación Profesional, Carmen Pomar, visitou o CEIP Raíña Fabiola (Santiago de Compostela), onde se reuniu cun grupo de representantes da Entidade para a Lingua Frisoa (DINGtiid), organización non gubernamental que ten atribuídas as funcións de asesoría ao goberno da rexión de Frisia (Países Baixos) en materia de política lingüística. Na reunión participou tamén o secretario xeral de Política Lingüística, Valentín García.
27 de xaneiro de 2020
O secretario xeral de Política Lingüística da Xunta, Valentín García, participou, no Centro Cultural Torrente Ballester, na inauguración da mostra "Imaxe de cen anos", coa que o Concello de Ferrol abre o ano dedicado a Ricardo Carvalho Calero.
Fonte: O Portal da Lingua Galega
24 de xaneiro de 2020
Un estudo realizado pola oficina estatística do Canadá revela que entre 2006 e 2016 aumentou o bilingüismo inglés-francés nas familias canadenses grazas aos programas de inmersión.
Fonte: Global News
24 de xaneiro de 2020
A longametraxe do director Lois Patiño Lúa Vermella estrearase na Berlinale, o Festival de Cinema de Berlín. O filme, rodado en galego, foi seleccionado pola Berlinale xunto a outros títulos de varios países.
Fonte: CRTVG
Boletín
Subscríbase ao boletín
