Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O prazo para presentar candidaturas ao III Premio Luís Porteiro Garea amplíase ata o 31 de maio de 2020. Trátase dun galardón que recoñece o esforzo de persoas ou entidades que traballan a prol da normalización do uso do galego na Universidade de Santiago.
Fonte: Universidade de Santiago
A canle de televisión pública portuguesa RTP tenta suplir o ensino presencial cunha oferta de contidos didácticos de diferentes materias do currículo escolar. Unha das materias ofertadas é o español como lingua estranxeira.
Fonte: elTrapezio
A Asociación de Escritoras e Escritores Eslovenos (DSP, polas súas siglas en esloveno) promoverá a literatura contemporánea catalá con motivo do Día Mundial do Libro.
Fonte: STA
A pandemia do coronavirus e a situación de illamento social supón unha ameaza para moitas linguas ameazadas do mundo. Nas Illas Andaman, administradas pola India, só tres persoas falan unha variedade da familia de linguas andamanesas que podería desaparecer coa expansión do virus.
Fonte: Scientific American
Coa visión posta no próximo 5 de maio, Día Mundial da Lingua Portuguesa, o presidente de Cabo Verde, Jorge Carlos Fonseca, defendeu que o futuro do portugués está en África e no Brasil e na presenza desta lingua nos organismos internacionais.
Fonte: Notícias ao Minuto
Os museos e arquivos xestionados pola Xunta de Galicia súmanse á programación en liña con motivo do Día do Libro o vindeiro xoves 23 de abril. O obxectivo é fomentar a lectura entre a sociedade e seguir dando ao libro todo o protagonismo que merece, con especial énfase neste contexto de confinamento.
Fonte: Xunta de Galicia
Co gallo do Día do Libro, a Xunta de Galicia distribúe en 14 hospitais públicos un total de 4000 libros procedentes das adquisicións da Consellería de Cultura e Turismo a editoras para o seu agasallo xeral e uso nas aulas hospitalarias.
Fonte: Xunta de Galicia
A Xunta, a Dirección Rexional de Cultura do Norte (Portugal) e a Agrupación Europea de Cooperación Territorial Galicia-Norte de Portugal (AECT) modificaron algunhas das bases da sexta edición do premio literario Nortear en canto á presentación das candidaturas, debido á actual situación de emerxencia sanitaria como consecuencia do coronavirus.
O Concello de Valencia preparou unha serie de propostas para celebrar o Día do Libro e fomentar o uso do valenciano no marco da actual crise sanitaria, que incrementou notablemente a presenza do Gabinete de Normalización Lingüística municipal nas redes sociais.
Fonte: NoticiasDe
A Dirección Xeral de Política Lingüística publicou a Terminoloxía básica da COVID-19 en lingua de signos catalá. O obxectivo desta publicación é dar a coñecer os principais termos e expresións relacionados con esta epidemia.
Fonte: Generalitat de Catalunya
Subscríbase ao boletín
