Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Durante o confinamento, a través do portal web do Museo do Prado será posible percorrer a súa colección en nove linguas. Ademais de España, foron Italia, México, Rusia e Arxentina os países que máis o visitaron de maneira virtual durante o mes de marzo.
Fonte: Siglo XXI
O novo regulamento para as escolas infantís municipais da Coruña, que aínda non está aprobado, inclúe entre os seus obxectivos a difusión da cultura galega e o uso do galego como lingua vehicular, así como o reforzo do ensino do inglés.
Fonte: La Opinión
«Per Sant Jordi, una paraula!» é unha iniciativa participativa coa que o Goberno balear pretende que a cidadanía comparta palabras en catalán a través das redes sociais o 23 de abril, día de San Jordi, co cancelo #parauladesantjordi.
Fonte: Govern Illes Balears
O sitio web da Delegada de Migración, Persoas Refuxiadas e Integración da República Federal Alemá publica e divulga información actualizada sobre o coronavirus nun bo número de linguas estranxeiras.
Fonte: Die Beauftragte der Bundesregierung für Migration, Flüchtlinge und Integration
Marrocos aprobou finalmente a creación do Consello Nacional de Linguas e da Cultura Marroquí (CNLCM, polas súas siglas en francés) que se encargará de promulgar todos os ditames de ámbito lingüístico do país africano.
Fonte: L'Economiste
Radio Picariña, a canle dixital de música infantil e xuvenil da Radio Galega, alcanzou xa as 1000 cancións en galego no seu catálogo en liña, ao que acaban de incorporarse novos temas de artistas como Fofó, Chuches Amil, Mamá Cabra, João Afonso, Alonso Caxade ou Sara Vidal.
Fonte: Nós Diario
O tradutor neuronal Itzuli rexistrou en marzo os mellores datos de uso desde a súa posta en marcha, ao alcanzar as 4 757 801 traducións, case o dobre que no mes anterior. O 56 % destas foi de castelán a éuscaro e o 44 % restante, de éuscaro a castelán.
Fonte: Gasteiz Berri
A Asociación de Medios en Galego convoca o seu certame de vídeos, podcasts e regueifas ao que poderán presentarse traballos nos que se relacione a lingua galega e os medios de comunicación. Poden participar no concurso persoas individuais de entre 12 e 30 anos e tamén aulas de ESO, Bacharelato e ciclos formativos.
Fonte: Código Cero
A Unidade de Normalización Lingüística creou un vocabulario de Semana Santa e de Pascua en formato de postais para aprender léxico en valenciano. As devanditas postais difundiranse a través das redes sociais desta institución provincial.
Fonte: València Extra
En tan só cinco meses, a aplicación gratuíta para a aprendizaxe de linguas Duolingo bateu un récord no número de usuarias e usuarios que queren aprender gaélico escocés. Actualmente unhas 300 000 persoas están aprendendo esta lingua nesta plataforma, cifra que supera amplamente o seu número total de falantes en toda Escocia.
Fonte: The Scotsman
Subscríbase ao boletín
