Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Instituto Politécnico de Macau (IPM) abriu o Centro Internacional Portugués de Formación en Interpretación de Conferencia que se ocupará da capacitación dos e das profesionais da interpretación de conferencia entre o portugués e outras linguas. Este centro reforzará a cooperación entre China e os países lusófonos.
Fonte: País ao Minuto
Antzerki Aroa pecha as representacións en éuscaro na cidade de Pamplona coa interpretación dunha obra nacida da improvisación na que se reflexiona sobre a condición do ser humano e a súa maldade.
Fonte: La Vanguardia
O Léxico de doenzas minoritarias, elaborado en colaboración co Servizo Catalán da Saúde, recolle máis de 470 conceptos sobre estas enfermidades en catalán, coas súas equivalencias en castelán, inglés e francés.
Fonte: Generalitat de Catalunya
Os cambios foron realizados no curso 2016/2017 en cinco escolas infantís (0-3 anos) e supuñan unha reconfiguración da planificación educativa para a que o concello non ten competencia, segundo o auto do Tribunal Superior de Xustiza, pois incumpre o Decreto Foral que obriga a garantir a continuidade no mesmo centro do modelo lingüístico escollido polo alumnado ata o final da súa escolarización.
Fonte: El Diario
Ledigal é unha aplicación, desenvolvida polo Instituto da Lingua Galega, que permite coñecer a variación sociolingüística no léxico dispoñible do galego, entendendo por léxico dispoñible o que se presenta na mente dos falantes de xeito inmediato e natural cando se trata de determinado ámbito temático.
Fonte: Consello da Cultura Galega
Dende hai semanas o colectivo recibe queixas denunciando este feito, polo que se dirixen ás administracións competentes para esixir o cumprimento dos pactos acadados nos estatutos de autonomía referentes á presenza e defensa do galego nos territorios limítrofes con Galicia.
Fonte: Info Bierzo
O novo certame escolar Senda dos Faros promoverá o valor lingüístico, patrimonial e paisaxístico da costa galega ao longo do máis de medio cento de etapas que o configuran, desde Tapia de Casariego (Asturias) ata Vila Nova de Cerveira (Portugal), para alén das etapas insulares de Ons, Cíes e Sálvora.
Fonte: O Portal da Lingua Galega
O Congreso do estado mexicano do Iucatán aprobou por unanimidade a introdución do ensino obrigatorio da lingua maia nas escolas. Aproximadamente o 25 % da poboación deste territorio mexicano fala este idioma.
Fonte: Nationalia
A Sociedade da Lingua Galesa (Cymdeithas yr Iaith Gymraeg) reclamou ao Goberno do País de Gales que garanta a contratación de máis profesorado capaz de impartir clases en lingua galesa para poder facer realista o obxectivo de conseguir un millón de falantes de galés para 2050.
Fonte: NationCymru
O proxecto internacional NexusLinguarum axudará a reducir as barreiras lingüísticas en Europa e favorecerá o comercio electrónico e o intercambio cultural entre países de distinto idioma. Así mesmo, servirá de apoio ás linguas minoritarias cuxo soporte tecnolóxico sexa limitado.
Fonte: Aragón Digital
Subscríbase ao boletín
