O Goberno vasco confirmou a aprobación dunha nova liña de axudas que irá dirixida á promoción, desenvolvemento e normalización do uso da lingua vasca no ámbito dixital. Estas subvencións poderán destinarse tanto a proxectos novos como a outros que xa se atopen en marcha.

Fonte: La Vanguardia

Txikipedia é un proxecto posto en marcha por Euskal Wikilarien Elkartea. Trátase dunha enciclopedia en éuscaro para nenas e nenos de 8 a 13 anos, cuxo léxico e sintaxe se adaptaron a esa franxa de idade para que a súa lectura e comprensión resulten máis doadas.

Fonte: EITB

O Parlamento vasco solicitoulle ao Goberno central que o coñecemento das linguas oficiais, como o caso do éuscaro, se teña en conta coma un mérito nos postos da oferta pública de emprego nos que o uso destes idiomas sexa indispensable.

Fonte: Cope

A plataforma Eibarren Akebai convoca para o vindeiro 20 de abril de 2018 unha proba para atopar unha persoa que durante once días mostre a súa vida en éuscaro na cidade guipuscoana de Eibar, gravando situacións cotiás en diferentes ambientes da cidade e animando o público a usar esta lingua.

Fonte: Diario Vasco

A Real Academia da Lingua Vasca fixo entrega dos Premios Azkue de Literatura, dirixidos á rapazada de entre 10 e 17 anos e que nesta edición recibiu ata 151 escritos. O obxectivo destes premios é fomentar a escritura en éuscaro entre a xuventude.

Fonte: Deia

O Goberno vasco, en colaboración coa Oficina Pública da Lingua Vasca, confirmou o presuposto que se destinará á promoción do éuscaro en Iparralde, o País Vasco francés, seguindo coas accións establecidas no convenio marco para o período 2017-2022 e que se centran na transmisión, o uso, a calidade e actitude ante a lingua.

Fonte: EITB

A orquestra de cámara Arimaz, do municipio guipuscoano de Tolosa, levará ao escenario por primeira vez en éuscaro a ópera de W.A. Mozart "Bastian und Bastienne", que xa fora traducida a este idioma no ano 1957.

Fonte: Noticias de Guipuzkoa

O Goberno vasco e a Autoridade Portuaria firmaron un convenio de catro anos de duración para lograr un maior uso do éuscaro mediante a súa promoción e normalización.

Fonte: Deia

Lansarean, a primeira aplicación en éuscaro para buscar traballo, conta xa con 4000 ofertas, 400 empresas e 2900 usuarios. Foi lanzada por Bai Euskarari Elkartea coa intención de dirixirse aos profesionais que buscan traballo e ás empresas que ofrecen oportunidades laborais.

Fonte: Noticias de Gipuzkoa

O vindeiro 17 de maio celebrarase en San Sebastián a terceira edición do Día de Internet en Éuscaro, que porá o foco nos móbiles para coñecer que modelos poden utilizarse en lingua vasca.

Fonte: EITB