Este informe ofrece a porcentaxe aproximada da actividade e mais o volume de negocio que xera a produción de bens ou servizos realizados en galego no sector da cultura, ao tempo que achega suxestións sobre as medidas que serían necesarias para incrementar a demanda de bens ou servizos en galego, fornecidas polos propios responsables das entidades culturais. Con este novo traballo complétase a radiografía presentada nun informe anterior, O valor económico do galego, tamén elaborado polo CCG.

Neofalantes.gal é un sitio web social centrado nos neofalantes. En concreto, céntrase nas súas traxectorias vitais, nas súas expectativas e nas súas demandas individuais e sociais. En definitiva, nas formas de experimentación que atinxen o cambio que decidiron incorporar na súa vida e que os converte en verdadeiros protagonistas da recuperación do galego. Neste informe recóllese toda a actividade deste sitio web, estatísticas, visitas etc.

Este volume recolle traballos que teñen a súa orixe nos relatorios presentados no Simposio «Estándar, norma e variación: procesos, problemas e perspectivas», organizado polo Instituto da Lingua Galega en 2021.

Este é un volume coas conclusións dos XXV Encontros para a Normalización Lingüística: economía, lingua e sustentabilidade, organizados polo Consello da Cultura Galega. Entre as súas conclusións sinálase, entre outros aspectos, que o uso do galego na actividade comercial é moi rendible, pois representa un motor económico para as persoas propietarias e traballadoras, así como para quen fornece produtos ou presta servizos complementarios no contorno. 

Consulte o documento

Este volume presenta unha análise exhaustiva sobre o estado actual e as perspectivas futuras do sector das tecnoloxías lingüísticas (TL) en Galicia e, por extensión, en España. Segundo este estudo, as tecnoloxías lingüísticas, que combinan a intelixencia artificial coa linguaxe, están experimentando un crecemento significativo grazas aos avances tecnolóxicos, a gran dispoñibilidade de datos e a ampla gama de aplicacións e utilidades. A inclusión do galego e outras linguas minorizadas nas tecnoloxías da lingua é crucial para evitar a súa discriminación dixital.

Neste volume explóranse as relacións entre lingua e xénero, ata o de agora escasamente investigadas na tradición sociolingüística galega. O obxectivo desta obra é debullar as diferenzas e as desigualdades nos usos e nas valoracións da lingua que se artellan sobre esta variable sociocultural. Para isto, recórrese á revisión de investigacións precedentes e á análise de datos dos principais bancos, censos e enquisas.

Neste traballo do Observatorio da Cultura Galega delimitáronse e cuantificáronse, en termos de valor económico e emprego, as actividades asociadas á lingua galega. A tese principal é que a lingua ten un mercado e unha industria propios e que estes son cuantificables. Para estimar o valor económico da lingua delimitáronse, en primeiro lugar, os bens e servizos directamente relacionados coa lingua como elemento diferencial no seu proceso produtivo e, con posterioridade, as actividades que os producen.

O volume estrutúrase en dúas seccións: unha primeira que compila estudos nos que se explotan os datos contidos nos recursos documentais “Patrimonio léxico da Gallaecia” (PLG) e “Tesouro do léxico patrimonial galego e portugués” (TLPGP), e unha segunda que xunta unha serie de experiencias didácticas relacionadas coa recolleita de léxico patrimonial.

Neste informe analízase a presenza do galego nos contidos infantís e xuvenís dos principais servizos audiovisuais de televisión.
En termos xerais, sinálase que “só a programación infantil e xuvenil da TVG garante unha mínima presenza do galego na grella das principais operadoras de servizos de televisión”. De feito, no conxunto das operadoras analizadas (Movistar, Vodafone, R e Orange), o galego só ten presenza 2 horas e 25 minutos ao día (sempre nas emisións da TVG2).
 

O traballo define algunhas ferramentas e propostas dirixidas a mellorar o ensino da situación sociolingüística do galego nas aulas de secundaria e busca contribuír a que o alumnado comprenda a situación de minoración na que se atopa o idioma. De feito, a guía destaca que dentro da amálgama de coñecementos lingüísticos presentes no sistema educativo, a perspectiva sociolingüística crítica é fundamental se se quere contribuír dende o ensino a que “o alumnado acade unha plena autonomía, xustiza e liberdade lingüísticas como suxeito social”.