O 72 % do alumnado que se presentou ás probas gratuítas organizadas pola Xunta para acreditar o nivel de inglés nos niveis B1, B2 e C1 do marco común europeo de referencia para as linguas (MCERL) conseguiu a certificación.

Fonte: Galicia Confidencial

A Mesa pola Normalización Lingüística denunciou que a aplicación móbil Radar COVID, creada polo Ministerio de Sanidade para rastrexar contactos e axudar así a mitigar a pandemia do coronavirus, está dispoñible en español e en inglés, pero non en ningunha das outras linguas cooficiais.

Fonte: Códico Cero

A Consellería de Cultura e Turismo publica no Diario Oficial de Galicia a convocatoria de dez bolsas de formación en proxectos de investigación no Centro Ramón Piñeiro para a Investigación en Humanidades (CRPIH). A convocatoria ten como obxectivo reforzar a investigación lingüística, literaria, histórica e antropolóxica sobre a lingua propia de Galicia, co fin de avanzar na súa normalización e promover o seu uso en todos os eidos profesionais e sociais.

Fonte: Xunta de Galicia

O secretario xeral de Política Lingüística, Valentín García, visitou o mural ilustrado por María Herreros sobre as famosas Marías compostelás, no marco do programa de verán Compostela Ilustrada, nos soportais do Museo das Peregrinacións de Santiago.

Fonte: O Portal da Lingua Galega

Ferrol acolle a celebración de dous cursos de lingua de signos para adultos organizados pola Asociación de Persoas Xordas de Ferrolterra e impartidos pola profesora Teresa Gallo.

Fonte: La Voz de Galicia

O acto de entrega dos Premios de poesía, relato curto e tradución literaria, que estaba previsto para o Día das Letras Galegas e que foi adiado por mor da pandemia, celebrouse na Casa de Rosalía en Padrón.

Fonte: Universidade de Vigo

Os orixinais dos Premios de ensaio e banda deseñada en galego poden presentarse ata o 30 de setembro e deberán ser inéditos e non premiados noutro certame. Establécese un primeiro premio de 700 € e dous accésits de 250 € para cada unha das modalidades.

Fonte: Universidade de Vigo

O premio de literatura infantil Carlos Mosteiro, que convoca o Concello da Pobra do Caramiñal, chega á súa terceira edición. A este galardón, que conta cunha dotación económica de 1500 euros, deberán presentarse orixinais escritos en galego de obras de creación literaria dirixidas a nenas e nenos de 3 a 12 anos de idade.

Fonte: El Correo Gallego

A Consellería de Cultura e Turismo publicou no DOG a orde que establece as bases reguladoras da subvención a entidades locais para a dotación de novidades editoriais en galego en formato físico e para a mellora das coleccións bibliográficas, con destino ás bibliotecas e/ou axencias de lectura públicas de titularidade municipal, integradas na Rede de Bibliotecas Públicas de Galicia.

Fonte: CulturaGalega

A Asociación Sindical Galega de Guionistas abriu a convocatoria do segundo Premio AGAG de guión en galego para longametraxe 2020, un galardón que ten entre os seus obxectivos fomentar o uso desta lingua no audiovisual e dar a coñecer as autoras e autores que escriben neste idioma.

Fonte: Audiovisual451