François Alfonsi, o único falante de corso no Parlamento Europeo, presentará un informe sobre o estado das linguas ameazadas de Europa. "Existen centos de linguas na Unión Europea e todas e cada unha delas forman parte da identidade europea", declarou François Alfonsi á Comisión de Cultura do Parlamento Europeo e engadiu: "Sen apoio a nivel europeo, nacional e local, seremos testemuñas, durante as vindeiras décadas, dunha perda da diversidade lingüística. Isto empobreceranos cultural, social e economicamente".

Fonte: The Independent

O novo embaixador de Portugal en Timor Leste, Manuel Gonçalves de Jesus, clasifica a promoción da lingua e a colaboración comercial como prioridades diplomáticas e promete manter unha "relación especial" entre os dous países.

Fonte: SIC Notícias

O Principiño, unha das obras máis traducidas da historia, celebra o seu septuaxésimo aniversario. As súas múltiples edicións inclúen versións en preto de 210 linguas. Comunidades lingüísticas moi pequenas, como a frisoa ou a saami, tamén contan cunha tradución propia.

Fonte: Nationalia

A Corporación Nacional de Desenvolvemento Indíxena de Chile aprobou un programa para que 120 comunidades mapuche da rexión da Araucania aprendan a súa lingua orixinaria.

Fonte: Biobio Chile

A oficina de Julian Fantino, ministro canadense de Cooperación Internacional, pediu que todas as súas comunicacións fosen redactadas unicamente en inglés, feito que contravén a lexislación canadense de linguas oficiais.

Fonte: Le Devoir

Unha manifestación en Zagreb esixe que a latina siga sendo a única escrita aceptada na cidade de Vukovar. Segundo as leis croatas, os serbios desta cidade teñen dereito a usar oficialmente o alfabeto cirílico.

Fonte: Nationalia

A Axencia Central de Noticias de Corea do Norte (ACNC) deixou de publicar momentaneamente noticias en linguas estranxeiras.

Fonte: Rádio Voz da Rússia

A primeira enquisa sociolingüística que se realiza en Córsega sobre a lingua rexional revela, ademais dun forte sentimento de apego á lingua, un importante consenso a favor do bilingüismo en toda a illa.

Fonte: Corse Net Infos

A última edición do Atlas das linguas do mundo en perigo da Unesco revela que a lingua piemontesa corre o risco de desaparecer. O Concello de Turín convida o Goberno e Parlamento italianos a incluír o piemontés no grupo de linguas minoritarias protexidas.

Fonte: Torino Today

A editorial galesa Y Lolfa enviou unha petición á multinacional Amazon para que permita a publicación en Kindle de libros electrónicos en galés. A iniciativa reuniu xa máis de 2000 sinaturas.

Fonte: Wales Online