Uzbekistán está a reforzar o ensino do coreano coa creación dun novo departamento universitario e dun centro de formación de profesorado en Bukhara. A iniciativa pretende responder ao crecente interese pola lingua coreana e contribuír á formación de novos docentes.

Fonte: The Korea Herald

Estudos europeos sinalan que o coñecemento de linguas estranxeiras pode supor unha vantaxe laboral nos Países Baixos, aínda que a súa importancia varía segundo o sector e o posto de traballo. O inglés mantén un papel especialmente relevante nos ámbitos internacionais, mentres que outras linguas, como o portugués, tamén poden abrir novas oportunidades no mercado laboral neerlandés.

Fonte: Região Sul

A Universidade de Turismo de Macau está a ampliar a súa cooperación internacional con países de lingua portuguesa e España, con novos acordos de formación e intercambio académico con Mozambique, Angola e institucións españolas. A iniciativa busca reforzar o papel de Macau como ponte entre China e os países de lingua portuguesa e, agora tamén, o mundo hispánico.

Fonte: Correio da Manhã

O Concello de Cork presentou un plan de acción para 2026-2029 destinado a apoiar e ampliar o uso do irlandés. Entre as propostas figuran a creación dun centro cultural dedicado á lingua e a posibilidade de establecer espazos de inmersión lingüística (Gaeltachts) en distintos puntos da cidade.

Fonte: Echo LIVE

Centos de estudantes kurdos boicotean o inicio do curso en Siria para protestar contra o plan do Goberno, que limita o ensino en kurdo a tres clases semanais e pon fin á súa utilización como lingua vehicular. Familias, docentes e entidades kurdas reclaman manter o dereito a recibir o ensino na súa lingua, como acontecía nos últimos anos baixo a administración autónoma kurda.

Fonte: Diari de la Llengua

O ministro de Familia e Refuxiados de Luxemburgo, Max Hahn, anima as persoas solicitantes de asilo a aprender unha ou varias das linguas oficiais do país desde o primeiro día, como vía para facilitar a súa saída dos centros de acollida. O ministro descarta, ao mesmo tempo, aumentar o número de prazas dispoñibles nestas instalacións.

Fonte: Luxembourg Times

O Goberno irlandés propón esixir ás persoas solicitantes da cidadanía coñecementos de inglés e irlandés, así como unha proba sobre a sociedade e os valores do país. A reforma tamén elevaría de cinco a oito anos o período de residencia necesario para solicitar a cidadanía.

Fonte: Sky news

As prazas dos cursos presenciais de catalán dos niveis A1 e A2 en Andorra esgotáronse poucas horas despois de abrirse o prazo de inscrición, repetindo a elevada demanda das últimas convocatorias. O interese por aprender catalán aumentou tras a entrada en vigor da Lei da lingua propia e oficial, que establece requisitos de coñecemento do idioma para renovar o permiso de residencia.

Fonte: Diari de la Llengua

A canle pública galesa S4C nomeou Catrin Cooper como responsable de cinema e Dafydd Llewelyn como responsable de ficción, dous novos cargos destinados a reforzar a súa aposta pola produción audiovisual en lingua galesa.

Fonte: Screen Daily

A traballadora humanitaria portuguesa Joana Pechirra publicou Bu Obi Kriol?!, un manual práctico e de acceso gratuíto para aprender crioulo guineano, nacido das súas propias notas de campo en Guinea-Bissau. A obra busca cubrir a falta de materiais introdutorios e facilitar tanto a aprendizaxe da lingua como o achegamento á cultura local. Ademais, o proxecto pretende combater prexuízos lingüísticos e reforzar a integración social, ao tempo que se converteu nun recurso útil tamén para a diáspora e para persoas interesadas noutras linguas.

Fonte: Observatório da Língua Portuguesa