Mundo

Adíase o festival nacional Eisteddfod no País de Gales por mor do coronavirus

A situación causada pola pandemia do coronavirus obrigou o equipo organizador do festival nacional Eisteddfod, a celebración máis importante de poesía e música en lingua galesa, a adialo para o ano que vén.

Fonte: Wales Online

O presidente da República de Portugal lamenta o pasamento da lingüista Maria Helena Mira Mateus

O presidente da República de Portugal, Marcelo Rebelo de Sousa, transmitiu o seu pesar pola perda da lingüista Maria Helena Mira Mateus a quen gabou pola "súa batalla incansable en defensa da lingua portuguesa".

Fonte: País ao Minuto

Suecia investigará os supostos crimes cometidos contra falantes da lingua minorizada meänkieli

O Goberno de Suecia declarou que creará unha comisión que examinará os abusos cometidos polo Estado sueco contra a minoría lingüística meänkieli con motivo das políticas de asimilación que se aprobaron en tempos pasados.

Fonte: The Japan Times

Asínase un acordo en Colombia para traducir as sentenzas xudiciais ás linguas indíxenas

Un acordo asinado pola Corte Constitucional de Colombia e a ONG Amazon Conservation Team permitirá traducir ás linguas indíxenas de Colombia as sentenzas xudiciais. As linguas awá, inga, wayuu, witoto e emberá serán as primeiras en entrar no proxecto.

 

Fonte: Semana Sostenible

 

Un filme rodado en gaélico recibe o premio á mellor produción no Festival Internacional de Cinema de Dublín

O filme Arracht, gravado en gaélico irlandés, recibiu dous premios no Festival Internacional de Cinema de Dublín. Un dos galardóns foi o de mellor película irlandesa.

Fonte: Dublin Gazette

Medra o ensino de portugués na Universidade de Oxford

Phillip Rothwell, titular da Cátedra D. João II e director do Centro de Lingua Portuguesa da Universidade de Oxford declarou que o ensino do portugués está en expansión neste centro de ensino superior británico.

Fonte: País ao Minuto

Crean un centro de información científica en lingua portuguesa

O Instituto de Hixiene e Medicina Tropical da Universidade Nova de Lisboa creou un centro de información científica cuxo obxectivo é reunir e difundir contidos en lingua portuguesa sobre a actual pandemia do COVID-19.

Fonte: Expresso das Ilhas

Unha universitaria escocesa ofrece aulas gratuítas de lingua de signos durante o confinamento

Unha estudante escocesa da Universidade de Edimburgo está a ofrecer aulas en liña gratuítas de lingua de signos británica durante o período de confinamento. O obxectivo que busca a rapaza é concienciar as persoas sobre a importancia desta lingua.

Fonte: Edinburgh News

As visitas telemáticas do Hermitage en lingua italiana rexistran un grande éxito

A transmisión en vivo en lingua italiana do museo do Hermitage de San Petersburgo rexistra un grande éxito. Un total de 10 000 persoas seguiron o directo e outras 160 000 estableceron conexión nalgún momento.

Fonte: Sassari Notizie

Colectivos de persoas xordas do Canadá gaban o recente incremento no uso de intérpretes en lingua de signos

Integrantes da Asociación Canadense de Intérpretes de Lingua de Signos e da comunidade de persoas xordas de Toronto agradeceron o incremento no uso dos servizos de interpretación nesta lingua por mor da pandemia do COVID-19.

Fonte: Global News

Boletín

Subscríbase ao boletín

Logo Feder