Centos de nenas e nenos participaron nun encontro escolar en Cornualles para celebrar a aprendizaxe do córnico, unha lingua celta que vive un importante proceso de recuperación. O Consello de Cornualles promove iniciativas para ampliar o seu ensino e lograr que o alumnado adquira nocións básicas da lingua antes de rematar a educación primaria.

Fonte: The Guardian

Un total de 66 personalidades e diversas entidades da sociedade civil apoian a denominación "Pireneos Cataláns" na consulta cidadá aberta para escoller o novo nome do departamento dos Pireneos Orientais. A iniciativa considera que esta opción supón unha oportunidade histórica para reforzar o recoñecemento institucional da identidade catalá na Cataluña Norte.

Fonte: Diari de la Llengua

Un estudo revela que os grandes simios e os seres humanos comparten un patrón rítmico de riso que apenas mudou nos últimos 15 millóns de anos. A investigación, baseada na análise de gravacións de diferentes tipos de primates e humanos, suxire que esta forma de comunicación existía xa no devanceiro común destas especies e podería achegar novas claves para comprender a evolución da linguaxe humana.

Fonte: National Geographic

A China presentou Data Express, a primeira revista académica en lingua inglesa do país especializada na publicación de artigos sobre datos científicos. Impulsada pola Academia Chinesa de Ciencias, a iniciativa busca facilitar o intercambio internacional de datos de investigación, mellorar a súa accesibilidade e reutilización e reforzar a cooperación científica global nun contexto marcado polo crecente protagonismo da intelixencia artificial e da ciencia aberta.

Fonte: Research Information

A Asemblea Nacional francesa aprobou o proxecto de lei constitucional que outorga un estatuto de autonomía a Córsega dentro da República Francesa. A reforma recoñece determinadas singularidades da illa, entre elas a súa lingua, cultura e economía, como fundamento do novo marco autonómico. Con todo, o texto non contempla a oficialidade do corso nin garante o traspaso de competencias educativas, polo que o recoñecemento da lingua fica reducido, polo momento, a un carácter principalmente simbólico.

Fonte: Diari de la Llengua

O Ministerio de Cultura de Letonia ordenoulles ás institucións e empresas públicas dependentes do seu departamento que eliminen progresivamente o uso do ruso das súas actividades oficiais. A medida afectará a comunicación institucional, a publicidade, os eventos internacionais e os contidos publicados nas webs oficiais.

Fonte: Baltic News Network

A publicación Language Learning Later in Life recolle investigacións que demostran que a aprendizaxe de linguas en idades avanzadas non só é posible, senón tamén beneficiosa para o desenvolvemento persoal e o benestar. A obra analiza experiencias de persoas maiores en distintos contextos de aprendizaxe e desmonta a idea de que aprender idiomas é unha actividade reservada á mocidade. Os estudos recollidos destacan que o aprendizaxe de linguas contribúe a mellorar as capacidades cognitivas, favorece a socialización e promove o benestar emocional.

Fonte: Luton Today

O Instituto Politécnico de Portalegre, en Portugal, incorporará no próximo curso o grao en Linguas Aplicadas á Comunicación Dixital, unha titulación orientada á formación de profesionais capaces de traballar en contornos multilingües e dixitais. O programa combina o dominio de linguas estranxeiras coa creación de contidos, a comunicación institucional e empresarial, a tradución, a alfabetización dixital e o uso da intelixencia artificial.

Fonte: SAPO

Os Comisarios de Tráfico do País de Gales aprobaron a implantación dun novo sistema de lingua galesa co obxectivo de reforzar a prestación de servizos bilingües en galés e inglés. A medida busca mellorar o uso do galés nas comunicacións e na atención ao público, así como garantir unha maior presenza da lingua nos procedementos e servizos administrativos do organismo.

Fonte: Safer Highways

O Goberno de Andorra anunciou que as persoas que cheguen ao país a través do novo programa de contratación en orixe deberán ter coñecementos básicos de catalán como requisito para acceder a estes postos de traballo. Porén, non se lles esixirá acreditar oficialmente o nivel A1 da lingua antes da súa chegada.

Fonte: Diari de la Llengua