A UNESCO e a organización internacional para o libro xuvenil, IBBY, polas súas siglas en inglés, seleccionaron case 170 obras publicadas en máis de 150 linguas indíxenas e en perigo de desaparición. A colección inclúe álbums ilustrados, novelas, biografías, novelas gráficas e obras de non ficción publicadas entre 2018 e 2025. A iniciativa pretende destacar o papel da literatura infantil na transmisión das linguas ás novas xeracións e na conservación da identidade e dos coñecementos das comunidades.

Fonte: UNESCO

Aínda que a Constitución boliviana de 2009 recoñeceu 36 linguas nativas como oficiais xunto co castelán, 30 delas foron catalogadas pola Unesco como linguas en perigo de extinción. Os datos do último censo revelan que 12 teñen menos de cen falantes e outras tres están practicamente extinguidas. Entre as principais causas están a escasa transmisión ás novas xeracións, a migración do rural ás cidades, o maior prestixio social do castelán e a falta de medidas prácticas e continuadas para revitalizar estas linguas.

Fonte: El País

Un 53 % das persoas enquisadas nun estudo do Pew Research Center considera «extremamente ou moi importante» que as escolas estadounidenses ofrezan clases de español, a porcentaxe máis alta entre as linguas distintas do inglés. Uns 45 millóns de persoas maiores de cinco anos falan español na casa nos Estados Unidos, preto do 14 % da poboación, fronte ao 5 % de 1980.

Fonte: New York Post

O inglés foi recoñecido oficialmente en Nova Zelandia, onde xa tiñan ese status o maorí e a lingua de signos neozelandesa. A decisión completa o marco de recoñecemento oficial das principais linguas empregadas no país.

Fonte: Diari de la Llengua

Os primeiros resultados dunha tese da filóloga Sílvia Rovira, da Universidade de Barcelona, revelan que a mocidade de Andorra está a perder a distinción fonética entre as vogais abertas e pechadas do catalán. O estudo, baseado en entrevistas a máis de setenta persoas de todas as idades e parroquias do país, apunta a que este cambio se debe principalmente á evolución interna da lingua e non á influencia do castelán ou do francés.

Fonte: Diari de la Llengua

Durango acollerá do 13 ao 16 de agosto a décima Feira das Linguas Indíxenas Nacionais, dedicada ás nove linguas da rexión etnolingüística Baixío-Pacífico. Baixo o lema «Voces de resistencia e identidade», a cita combinará conferencias, obradoiros, cinema, poesía, expresións artísticas e mostras culturais. O encontro procura dar visibilidade á diversidade lingüística, promover os dereitos dos pobos indíxenas e apoiar as iniciativas comunitarias para revitalizaren e transmitiren os seus idiomas.

Fonte: Inali

Estrasburgo acollerá o 18 de setembro o concerto KCANTÀ, unha cita que reunirá artistas de distintas rexións francesas para celebrar a diversidade lingüística a través da música. O programa dará voz a idiomas como o bretón, o alsaciano, o occitano ou o éuscaro co obxectivo de reivindicar estas linguas como un patrimonio vivo, creativo e estreitamente vencellado á identidade dos territorios.

Fonte: JDS

O Correllengua Agermanat celebrará unha segunda edición en 2028, tras a ampla mobilización acadada este ano en defensa do catalán. A chama percorreu máis de 1500 quilómetros polos territorios de fala catalá e chegou tamén a Bruxelas, cunha participación estimada de 180 000 persoas. A organización pretende ampliar o alcance da iniciativa, sumar novas entidades e consolidar o seu carácter bienal.

Fonte: Diari de la Llengua

O Concello de Baiona, no País Vasco francés, recoñeceu o éuscaro e o gascón como linguas propias do territorio, xunto co francés. A decisión, aprobada por unanimidade, procura reforzar a súa presenza na comunicación institucional, na sinalización, nos servizos públicos e nas actividades educativas e culturais. O municipio tamén se compromete a apoiar a aprendizaxe, o uso cotián e a transmisión interxeracional de ambos os idiomas, considerados elementos esenciais da identidade e da cohesión social local.

Fonte: Breizh-Info

Mérida acollerá o 8 de agosto o primeiro Encontro de Municipios pola Lingua Maia, que reunirá representantes de cinco localidades para compartiren experiencias e acordaren medidas de revitalización. A xornada prevé mesas de traballo sobre a presenza do idioma nos servizos públicos, no emprego e na vida comunitaria. O programa tamén abordará a súa incorporación ás novas tecnoloxías, nun contexto marcado pola perda da transmisión familiar e pola discriminación histórica.

Fonte: Sol Yucatán