A experiencia de Gales na incorporación do galés ás tecnoloxías dixitais foi incluída nunha nova guía práctica da Unesco destinada a apoiar os servizos dixitais multilingües. O documento ofrece orientación para integrar linguas con poucos recursos, incluídas linguas indíxenas, en páxinas web, aplicacións e servizos públicos. A iniciativa pretende contribuír a que as linguas minoritarias teñan unha maior presenza no ámbito dixital e poidan manterse vivas nas novas formas de comunicación.

Fonte: Llywodraeth Cymru / Welsh Government

Investigadores do Trinity College de Dublín desenvolveron Geabaire, unha ferramenta de comunicación baseada en símbolos que permite que nenos e nenas autistas non falantes ou con fala limitada formen palabras e frases en irlandés. A aplicación, gratuíta, está pensada especialmente para facilitar a participación do alumnado nas escolas de ensino en irlandés e constitúe unha das primeiras ferramentas de comunicación deseñadas especificamente para unha lingua minoritaria da UE.

Fonte: Trinity College Dublin

Os responsables dos principais medios de Estonia reclaman modificar a Lei de Lingua para permitir novamente a dobraxe e as voces superpostas en linguas estranxeiras. Argumentan que a restrición pode reducir a audiencia, especialmente entre a poboación rusófona, e afectar os ingresos e a competitividade do sector audiovisual. 

Fonte: UA

Unha petición pública que reclama que residentes e traballadores do Luxemburgo aprendan obrigatoriamente luxemburgués superou as 5500 sinaturas necesarias para ser debatida no Parlamento. A iniciativa pretende reforzar o uso da lingua nacional como ferramenta de integración e propón facilitar ou mesmo obrigar os empregadores a ofrecer formación lingüística.

Fonte: Contacto

A ONU comezou a impartir por primeira vez un curso regular de portugués para diplomáticos, funcionariado e persoal asociado da organización en Nova York. A iniciativa, froito da colaboración entre as Nacións Unidas e o Goberno de Portugal, incorpora o portugués ao programa de linguas estranxeiras xunto cos seis idiomas oficiais da ONU. As prazas esgotáronse en menos de 24 horas e foi necesario crear unha lista de espera.

Fonte: ONU News

As escolas da rede pública estatal do Rio Grande do Norte, no Brasil, deberán ofrecer español desde o 6º curso de educación básica e en todos os cursos do ensino secundario. A medida, establecida pola Lei 12.905, pretende ampliar a formación lingüística do alumnado.

Fonte: Portal Gazeta RN

Vila Real de Santo António acolle a terceira edición da Feira das Linguas, unha iniciativa que pon en valor a diversidade lingüística e cultural da Eurocidade do Guadiana. O encontro reúne actividades destinadas a promover o coñecemento e o diálogo entre as diferentes linguas e culturas presentes neste territorio fronteirizo entre Portugal e España.

Fonte: Sulinformação

Alemaña, Suecia e Lituania rexeitan vincular o debate sobre a incorporación do catalán, o éuscaro e o galego como linguas oficiais da Unión Europea co proceso de ampliación do bloque. A posición destes tres países chega mentres España defende que o recoñecemento das linguas cooficiais se aborde antes da entrada de novos Estados membros na UE.

Fonte: Euronews

O 23 de setembro celébrase en todo o mundo o Día Internacional das Linguas de Signos, unha xornada impulsada polas Nacións Unidas para reivindicar a identidade lingüística e a diversidade cultural das persoas xordas. Este ano, a celebración chama a sumar esforzos para avanzar na garantía dos dereitos humanos da comunidade xorda.

Fonte: United Nations

A Nación Choctaw de Oklahoma presentou unha nova aplicación para aprender a súa lingua nativa. A ferramenta é gratuíta tanto para membros da nación como para outras persoas interesadas e incorpora gravacións realizadas con 90 falantes de choctaw, entre eles 32 falantes fluídos. O proxecto pretende facilitar a aprendizaxe da lingua e contribuír á súa transmisión ás novas xeracións.

Fonte: News on 6