Mundo

Conclúen as obras do Museo da Lingua Portuguesa de São Paulo

O Goberno do Estado de São Paulo anunciou a finalización das obras de reconstrución e restauración do Museo da Lingua Portuguesa que sufrira un incendio en decembro de 2015. A data prevista de reapertura será o 25 de xuño.

Fonte: Sprio+

Demandan no Parlamento da República Federal de Alemaña que se tomen medidas para incentivar o ensino da lingua rusa

O grupo do partido Die Linke (a Esquerda) do Parlamento da República Federal de Alemaña fixo unha petición para que se aclare a situación do ensino da lingua rusa en Alemaña e se fomente a súa incorporación en máis centros educativos.

Fonte: Elpaís.cr

A rede pública de radio e televisión do Canadá lanza un podcast en lingua cree

A rede pública de radio e televisión do Canadá, CBC, acaba de lanzar o seu primeiro podcast en lingua cree, un idioma aborixe falado por unhas 50 000 persoas en varias provincias canadenses.

Fonte: CBC

A Olimpíada da Lingua Portuguesa no Brasil xa ten vencedores

Alumnado de escolas públicas do Brasil de 12 estados recibiron os premios da sexta edición da Olimpíada da Lingua Portuguesa, iniciativa que organiza o Ministerio de Educación do Brasil e a Fundación Itaú Social. Minas Gerais e Ceará foron os estados con máis vencedores.

Fonte: EBC

Os EUA exclúen o portugués dun programa federal para o ensino de linguas estranxeiras

O programa Startalk dos EUA, que financia proxectos de ensino de linguas consideradas cruciais, non inclúe este ano o portugués. En troco, as linguas contempladas serán o árabe, o chinés, o hindi, o coreano, o persa, o ruso, o turco e o urdú.

Fonte: Público

Presentan unha campaña para que se aprobe unha lei integral de educación para o gaélico irlandés

O ministro de Educación da República de Irlanda recibiu unha petición de 12 000 sinaturas que demanda que se aprobe unha lei para o desenvolvemento integral do ensino do gaélico irlandés en todas as escolas do país.

Fonte: The Irish Times

A ferramenta de interpretación simultánea de Google chega aos móbiles

O xigante da tecnoloxía Google anunciou que a súa ferramenta de interpretación simultánea "Interpreter mode" xa se pode empregar nos dispositivos de telefonía móbil. O programa permitirá traducir oralmente contidos dunha lingua a outra dun xeito simultáneo.

Fonte: CNET

Os municipios con comunidades indíxenas do Brasil poderán oficializar as súas linguas nativas

A Comisión de Dereitos Humanos e Minorías da Cámara dos Deputados do Brasil aprobou unha proposta que garantirá que os municipios de todo o Brasil que posúan comunidades indíxenas poderán oficializar as súas linguas nativas dentro dos seus territorios.

Fonte: Câmara dos Deputados

O Consello de Europa critica de novo a política lingüística da Xunta por limitar a docencia en galego

No seu quinto informe sobre o cumprimento da Carta Europea das Linguas Rexionais e Minoritarias, o Consello de Europa, con sede na cidade francesa de Estrasburgo, volveu censurar a política lingüística da Xunta de Galicia e pide, entre outras cousas, que se eliminen os atrancos á docencia en galego en todos os niveis educativos. 

Fonte: Praza Pública

Un quinto das novas incorporacións ao servizo público da República de Irlanda deberá ser competente en gaélico

O Goberno da República de Irlanda aprobou unha nova lei que deberá garantir que un quinto das persoas que se incorporen ao servizo público sexan competentes en gaélico irlandés. Esta medida pretende mellorar a atención pública en lingua irlandesa ás persoas que opten por empregar este idioma ante a administración.

Fonte: Independent

Boletín

Subscríbase ao boletín

Logo Feder