O Comité de Expertos da Carta Europea das Linguas Rexionais ou Minoritarias insta as autoridades de Bosnia e Hercegovina a reforzar a protección das 15 linguas amparadas pola Carta. O informe denuncia a falta de coordinación institucional, a escasa presenza destas linguas nos medios, na educación e na administración, e pide máis recursos, campañas de sensibilización e unha aplicación efectiva dos compromisos adquiridos.

Fonte: Council of Europe

O Instituto Ramon Llull impulsará na Universidade de Montreal o primeiro Centro de Estudos Cataláns situado fóra de Europa. A iniciativa pretende consolidar a docencia e a investigación sobre a lingua e a cultura catalás en América do Norte, reforzando a proxección internacional do catalán e a colaboración académica entre universidades.

Fonte: Diari de la Llengua

A cidade de Nova York lanzou NYC Language Explorer, unha ferramenta interactiva baseada en datos do censo que permite consultar as linguas faladas en barrios e distritos. O recurso está pensado para axudar as administracións públicas, fornecedores de servizos, investigadores e cidadanía a identificaren as necesidades lingüísticas da poboación e mellorar a planificación e o acceso aos servizos públicos.

Fonte: Cities Today

Euronews lanzou un novo servizo informativo en lingua kazaka, o primeiro en Asia Central da súa rede internacional. A iniciativa reforza a presenza do grupo en Casaquistán e busca ampliar o acceso á información internacional e á actualidade da rexión.

Fonte: Euronews

O Goberno flamengo estuda modificar os criterios de admisión nas escolas de ensino en neerlandés de Bruxelas ante o aumento da demanda por parte de familias francófonas e internacionais. O obxectivo é permitir que o alumnado flamengo poida obter praza nestes centros, considerados máis atractivos polos seus bos resultados académicos. 

Fonte: Brussels Times

O Goberno xaponés avanza na creación dun novo sistema que esixirá ás persoas estranxeiras acreditar coñecementos de xaponés e completar un programa sobre lingua, cultura e normas de convivencia para obter a residencia permanente.

Fonte: Japan Today

Un estudo presentado no Foro 2026 da Federación de Sociedades Europeas de Neurociencia (FENS) conclúe que as persoas que falan máis dunha lingua presentan características cerebrais propias de cerebros máis novos. A investigación apunta a que o plurilingüismo podería axudar a preservar a conectividade entre as neuronas.

Fonte: Medical Express

Especialistas e antigos responsables de Educación do Reino Unido advirten de que o peche e redución de carreiras de linguas nas universidades está a limitar as oportunidades para o alumnado de clase traballadora. Sosteñen que a diminución da oferta, unida á caída do ensino de idiomas nas escolas públicas, dificulta o acceso a estudos que tradicionalmente servían como vía de ascenso social.

Fonte: The Guardian

O condado de Carmarthenshire, no País de Gales, aprobou a ampliación da oferta educativa en lingua galesa en catro centros escolares de ensino primario. A medida pretende responder ao aumento da demanda e avanzar nos obxectivos de promoción do galés, facilitando que un maior número de alumnado poida recibir o ensino nesta lingua contribuíndo á súa normalización e revitalización.

Fonte: The Tenby Observer

O Goberno de Nova Zelandia ampliará un programa de desenvolvemento da linguaxe a centos de centros de educación infantil para mellorar as habilidades comunicativas das crianzas. A iniciativa responde á crecente preocupación polo impacto do uso excesivo de pantallas no fogar, que, segundo as autoridades educativas, pode contribuír aos atrasos na adquisición da linguaxe. 

Fonte: 1news