O programa PESSOAS 2030 reforzou o financiamento destinado á aprendizaxe do portugués por parte de cidadáns estranxeiros. A iniciativa busca facilitar a adquisición e certificación de competencias lingüísticas e favorecer a integración social, cultural e profesional das persoas migrantes en Portugal.

Fonte: PESSOAS 2030

O Barómetro WOOK 2026 revela un aumento da lectura regular en Portugal e unha maior presenza de obras noutras linguas, especialmente en inglés. O 72 % das persoas consultadas afirma ler con regularidade e arredor dun terzo dos lectores habituais tamén le en inglés, principalmente por gusto persoal, necesidades profesionais ou para practicar unha lingua estranxeira.

Fonte: Sapo

O crecente interese pola aprendizaxe do chinés en Kenya está a levar as institucións educativas a reforzar a formación do profesorado e a adaptar o ensino aos estándares internacionais de competencia lingüística. A incorporación progresiva desta lingua ao currículo educativo e o aumento da demanda no mercado laboral están detrás desta iniciativa, que tamén reclama materiais didácticos máis adaptados á realidade kenyana.

Fonte: KBC Digital

O Goberno francés permitirá que o alumnado da Cataluña Norte poida realizar en catalán un dos exames de especialidade do bacharelato e que o diploma inclúa a mención desta lingua. A medida entrará en vigor en 2028, unha vez que o alumnado que comece primeiro de bacharelato o vindeiro curso complete os estudos.

Fonte: Diari de la Llengua

As universidades de Coimbra e Politécnica de Macau reforzan a súa colaboración científica coa creación dun laboratorio conxunto dedicado ás Humanidades Dixitais e ás Ciencias da Linguaxe. A nova estrutura pretende impulsar proxectos de investigación e cooperación entre as dúas institucións, aproveitando as posibilidades das tecnoloxías dixitais para estudar a linguaxe e o patrimonio cultural. A iniciativa contribúe tamén a estreitar os vínculos académicos entre Portugal e Macau.

Fonte: Universidade de Coimbra

A prefectura dos Pireneos Atlánticos recorreu as decisións dos concellos de Sara e Baiona que recoñecen o éuscaro e, no caso de Baiona, tamén o gascón como "linguas do territorio". O Goberno francés argumenta que a Constitución establece o francés como lingua da República e considera que estas declaracións poderían achegarse a unha situación de cooficialidade. Baiona, pola súa banda, defende que a súa decisión é de carácter político e programático e que non modifica o funcionamento administrativo do concello. O caso deberá ser agora analizado polo Tribunal de Pau.

Fonte: El Diari de la Llengua

Google presentou SL2T, un modelo de intelixencia artificial capaz de interpretar xestos e expresións da linguaxe de signos e convertelos en texto. A tecnoloxía está concibida como unha alternativa aos sistemas de ditado por voz nos teléfonos móbiles e podería facilitar a comunicación escrita ás persoas xordas ou con dificultades para utilizar a voz.

Fonte: Infobae

O futuro do ensino de portugués fóra de Portugal está a ser obxecto dunha negociación entre o Goberno e os representantes dos docentes. A negociación para actualizar o Réxime Xurídico do Ensino Portugués no Estranxeiro avanza con algúns acordos, aínda que permanecen abertas cuestións como a retribución do profesorado, o sistema de avaliación, o réxime de faltas e a redución da carga lectiva.

Fonte: Observatório da Língua Portuguesa

A UNESCO e a organización internacional para o libro xuvenil, IBBY, polas súas siglas en inglés, seleccionaron case 170 obras publicadas en máis de 150 linguas indíxenas e en perigo de desaparición. A colección inclúe álbums ilustrados, novelas, biografías, novelas gráficas e obras de non ficción publicadas entre 2018 e 2025. A iniciativa pretende destacar o papel da literatura infantil na transmisión das linguas ás novas xeracións e na conservación da identidade e dos coñecementos das comunidades.

Fonte: UNESCO

Aínda que a Constitución boliviana de 2009 recoñeceu 36 linguas nativas como oficiais xunto co castelán, 30 delas foron catalogadas pola Unesco como linguas en perigo de extinción. Os datos do último censo revelan que 12 teñen menos de cen falantes e outras tres están practicamente extinguidas. Entre as principais causas están a escasa transmisión ás novas xeracións, a migración do rural ás cidades, o maior prestixio social do castelán e a falta de medidas prácticas e continuadas para revitalizar estas linguas.

Fonte: El País