Centos de estudantes, docentes e residentes participaron en varias marchas en cidades kurdas de Siria para reclamar que a lingua kurda sexa recoñecida oficialmente na futura Constitución siria. Os manifestantes tamén esixiron garantías para poder estudar e recibir educación na súa lingua materna.

Fonte: Hawar News

A chama do correlingua Agermanat chegou a L'Alguer, na Sardeña, tras iniciar o seu percorrido o pasado 19 de abril en Prada, na Cataluña Norte. A iniciativa percorreu territorios de fala catalá e fará a súa última parada o 9 de maio en Bruxelas para reivindicar a oficialidade do catalán na Unión Europea.

Fonte: Diari de la Llengua

O presidente do Instituto Internacional da Lingua Portuguesa, João Neves, defendeu a necesidade de reforzar o uso do portugués nos campos da ciencia, da tecnoloxía e do ámbito dixital. Segundo explicou, a lingua portuguesa debe gañar presenza na investigación, na intelixencia artificial e nos contidos en internet para garantir o seu futuro e a súa relevancia internacional.

Fonte: Balai

Un estudo recente publicado en Nature revela que o cerebro humano continúa procesando palabras e estruturas lingüísticas mesmo durante estados de inconsciencia provocadas por anestesia xeral. Os investigadores comprobaron que certas áreas cerebrais seguen interpretando e anticipando información lingüística, o que cambia a visión tradicional sobre a conciencia e o funcionamento do cerebro.

Fonte: Technology Networks

O centro educativo Bernat Etxepare, de Baiona, no País Vasco francés, rexeitou realizar en francés a proba de Matemáticas do bacharelato, defendendo que o alumnado debe poder examinarse tamén nas súas linguas propias. O caso abriu un debate sobre os dereitos lingüísticos, a presenza exclusiva do francés no ensino e a protección do éuscaro nas aulas.

Fonte: Diari de la Llengua

Un estudo internacional revela que o alumnado de cinco anos en Flandres obtén resultados por debaixo da media en habilidades básicas de matemáticas e lingua neerlandesa. A investigación destaca tamén fortes desigualdades sociais, xa que o alumnado de contornos desfavorecidos ou con menor exposición ao idioma na casa comeza a escolarización en desvantaxe.

Fonte: Belga News Agency

Varios lingüistas salientaron, con motivo do Día Mundial da Lingua Portuguesa, que a diversidade de variantes e a incorporación de neoloxismos son sinais evidentes da boa saúde do portugués, falado por máis de 260 millóns de persoas en todo o mundo. Defenden que o contacto entre as distintas variedades, de Europa, África, o Brasil e Asia, contribúe a enriquecer a lingua e a reforzar unha identidade común, ao tempo que subliñan a importancia de continuar promovendo o seu uso en múltiples ámbitos sociais e institucionais.

Fonte: Observador

A capital de Timor Leste inaugurou unha exposición dedicada ao escritor portugués José Saramago para dar inicio ás celebracións do Día Mundial da Lingua Portuguesa. A mostra pon en valor unha faceta menos coñecida do autor: a súa poesía. Ao longo da semana celebraranse diversas actividades culturais e educativas vinculadas á lingua portuguesa, co obxectivo de promover a lusofonía e fortalecer a cooperación cultural entre os países de fala portuguesa.

Fonte: Mundo Lusíada 

A organización internacional non gobernamental Human Rights Watch denunciou que o Goberno chinés está a aplicar políticas educativas que favorecen o mandarín e reducen progresivamente o uso do tibetano nas escolas infantís. A organización alerta de que o chamado plan de “harmonización lingüística” busca acelerar a asimilación cultural da poboación tibetana, limitando a presenza da súa lingua e identidade nas aulas.

Fonte: Human Rights Watch

O alcalde de Vilnius, capital de Lituania, iniciou unha campaña de recollida de sinaturas para propor que os cidadáns de fóra da UE teñan que acreditar coñecementos básicos de lituano (nivel A2) para renovar o seu permiso de residencia tras tres anos no país. A medida busca reforzar a integración e promover o uso da lingua vernácula entre a poboación estranxeira residente.

Fonte: Reform