A illa galesa de Anglesey volve acoller o Urdd Eisteddfod, un dos maiores festivais xuvenís de artes, cultura e literatura en lingua galesa de Europa, por primeira vez en máis de dúas décadas. O evento reúne milleiros de mozas e mozos de todo Gales para participar en competicións e actividades culturais en galés.

Fonte: ITV

O Ministerio de Educación de Francia decidiu permitir que os exames do bacharelato se poidan realizar en linguas minorizadas, o que supón un avance no seu recoñecemento no sistema educativo. A medida responde a anos de reclamacións de asociacións culturais e lingüísticas, mais tamén xera debate sobre a súa aplicación e impacto no sistema educativo.

Fonte: Diari de la Llengua

Un documental mostra a situación do jèrriais, a lingua tradicional da illa de Jersey, e os esforzos para a súa recuperación. Recolle testemuños dos últimos falantes nativos e destaca que o número de persoas que o falan está a diminuír rapidamente. Tamén lembra que no pasado o seu uso foi desanimado e mesmo castigado nas escolas. 

Fonte: BBC

Segundo datos difundidos polo British Council, existen máis de 6000 persoas que falan o chamado “galés patagón”, unha variedade do galés presente en comunidades da Patagonia arxentina. Este fenómeno lingüístico está ligado á emigración galesa histórica cara a esa rexión, onde a lingua se mantivo en determinados ámbitos familiares e comunitarios.

Fonte: El Valle

A BBC anunciou a creación de dous novos servizos dixitais de noticias en húngaro e romanés, pensados para ampliar o acceso a información independente en Europa Central e do Leste. As novas plataformas, BBC News Magyarul e BBC News România, ofrecerán contidos con temas como política internacional, saúde, tecnoloxía e clima, entre outros.

Fonte: BBC

O presidente do Perú, José María Balcázar, asegurou que o Executivo traballa para fortalecer a integración dos pobos indíxenas e preservar as linguas orixinarias do país. Durante a presentación de novas ferramentas de atención pública en linguas autóctonas, destacou que estas iniciativas reforzan a identidade nacional e facilitan o acceso a servizos como a sanidade para as comunidades que falan quechua, aimará e outros idiomas indíxenas.

Fonte: Andina

A Universidade de Macau abriu de novo as inscricións para a 40.ª edición do Curso de Verán de Lingua Portuguesa, que se celebrará entre o 6 e o 24 de xullo. O programa inclúe clases de idioma en distintos niveis, ademais de obradoiros de literatura, historia, cultura, danza e cinema.

Fonte: CM Jornal

Un novo estudo sobre actitudes lingüísticas mostra que a maioría da poboación de Irlanda do Norte apoia a promoción da lingua irlandesa, especialmente entre as xeracións máis novas. A enquisa sinala tamén un respaldo crecente á educación en irlandés e ás políticas de protección lingüística, nun contexto de maior visibilidade pública da lingua.

Fonte: Belfast Media

A intervención dunha deputada xamaicana en crioulo durante unha sesión parlamentaria provocou unha forte polémica sobre o papel da lingua popular do país nas institucións oficiais. A presidenta da cámara interrompeu o discurso ao considerar que o regulamento só permite o uso do inglés estándar.

Fonte: The Guardian

Activistas e defensores da lingua galesa celebraron a primeira reunión do gabinete do novo Goberno galés desenvolvida integramente en galés. O executivo liderado por Rhun ap Iorwerth considera que o xesto marca o inicio dunha nova etapa política centrada na identidade nacional, os servizos públicos e o impulso da lingua propia de Gales.

Fonte: Nation Cymru