A Universidade de Liverpool conmemora o centenario do ensino da lingua e da cultura catalás, unha tradición académica de longa traxectoria na institución. Con motivo desta efeméride, organízanse concertos, conferencias e encontros culturais para pór en valor este legado, que converteu o centro nun referente internacional na difusión do catalán no ámbito universitario fóra de Cataluña.

Fonte: Diari de la Llengua

O Parlamento de Gales aprobou unha lei que recoñece oficialmente a lingua de signos británica (BSL, polas súas siglas en inglés) e que busca mellorar os dereitos e a accesibilidade da comunidade xorda. A nova lexislación obriga o goberno galés a desenvolver medidas para promover o uso da BSL e afrontar as desigualdades que historicamente afectaron as persoas xordas en ámbitos como os servizos públicos, a educación ou o transporte.

Fonte: The Tenby Observer

O Ministerio de Educación da República de Irlanda abriu unha praza a tempo parcial na área do ensino da lingua portuguesa. A convocatoria está dirixida a persoas cun nivel mínimo B2.2 de portugués segundo o Marco Común Europeo de Referencia para as Linguas, experiencia docente no ensino secundario ou no terceiro ciclo de primaria e boas competencias dixitais. 

Fonte: Bom dia

O goberno chinés aprobou unha lei de “unidade étnica” destinada a fortalecer unha identidade nacional común e impulsar o uso do mandarín na educación e na vida pública. Analistas e organizacións de dereitos humanos alertan de que a medida consolida políticas de asimilación cultural que afectan especialmente a tibetanos, uigures e mongoles, ao reducir o espazo para as súas linguas e tradicións e aumentar o control estatal sobre estas comunidades.

Fonte: The Diplomat

O Museo da Lingua Portuguesa, situado na Estación da Luz en São Paulo, cumpre 20 anos o 21 de marzo de 2026 e celebrará o aniversario cun programa especial que inclúe visitas guiadas, obradoiros, concertos e actividades educativas.

Fonte: Afubesp

A nova versión do coche eléctrico Cupra Born converteuse no primeiro vehículo fabricado en Europa que permite utilizar o catalán na interface do seu sistema de información e entretemento. A novidade foi posible grazas á colaboración entre a empresa automobilística e entidades que promoven a presenza dixital do catalán.

Fonte: Diari de la Llengua

O Consello de Europa publicou un estudo sobre os principais retos e boas prácticas na protección das linguas rexionais e minoritarias en Europa. O informe analiza aspectos como o ensino destas linguas, a súa presenza social e o seu uso nas novas tecnoloxías e nas redes sociais. O obxectivo é identificar políticas eficaces que axuden a promover e preservar a diversidade lingüística no continente.

Fonte: Council of Europe

O ensino de portugués na rede do Instituto Camões enfróntase a problemas pola escaseza de docentes. Segundo a dirección da institución, aínda hai varios postos sen cubrir, especialmente na África austral e en Europa, o que dificulta a organización das clases. O Goberno portugués está a estudar cambios no marco legal do ensino do portugués no estranxeiro para atraer máis profesorado e mellorar o funcionamento do sistema.

Fonte: RTP

O Goberno francés anunciou que bloqueará o intento da Comisión Europea de aprobar acordos comerciais redactados unicamente en inglés. París defende que estes documentos deben estar dispoñibles tamén nas demais linguas oficiais da Unión Europea para garantir a igualdade lingüística entre os estados membros e a transparencia institucional. A medida forma parte do debate sobre o papel do inglés nas institucións europeas tras o Brexit.

Fonte: Diari de la Llengua

O Goberno da República Moldova aprobou un programa nacional para aprender romanés no período 2026-2028, destinado especialmente a persoas adultas e profesionais que necesitan mellorar o dominio da lingua. A iniciativa pretende reforzar as competencias lingüísticas da poboación e facilitar a integración social e profesional, promovendo o uso do romanés como lingua oficial do país. 

Fonte: Moldpres